Оҕо сылдьан, бу санаатахха, 11-12 саастаахпар, икки бырааппын батыһыннаран тииҥнии диэн барбыппыт.
Отут иккилээх уонна сүүрбэлээх биирдии уостаах саалаах этибит. Дэриэбинэттэн балачча ыраатан, уонтан тахса тииҥнэммиппит. Онтон арай ыркый ойуур быыһынан хааман истэхпитинэ, аттыбытыгар туох эрэ ынырык баҕайытык орулаабытыттан куттанан, тыатааҕы дии санаан, чугас турар улахан маска ыттыбыппыт. Ол олорон тыатааҕы кэллэҕинэ, тугу гынарбытын арыый обургу киһи толкуйдаабыта буолаахтаабытым. Ыркый ойуур буолан, кыылбыт көстүбэт, орулуура эрэ иһиллэр. Оннук халлааммыт да хараҥарбыта. Мас лабаатыгар дугунан турар, олорор дьон көһүйэн да барбыппыт. Кыылбыт оннук түүн буолуор диэри орулаабыта. Бырааттарым барахсаттар ытаһан барбыттара. Оннук лабааҕа хоройбутунан хоннохпут үһү.
Дьолго, саас буолан, сотору халлааммыт сырдаабыта. Утуктаан сордоно олорон хараҕым быыһынан көрдөхпүнэ, тыа быыһыттан кып-кыра, ыт саҕа кыыл орулаабытынан тахсан кэлбитэ. Мин соһуйан, олорор маспыттан сууллан түспүтүм. Ону кытта кыылым буут биэрбитэ. Булчут хааммыт оонньоон, кыылбытын эккирэтэр аатыгар түспүппүт. Икки чаас кэриҥэ эккирэтэн, дьэ, ситэн өлөрбүппүт. Кыылбыт туртаска маарынныыр эрээри, хара уонна аһыылаах этэ. Биһиги «мутант кыылы өлөрдүбүт» диэн кэпсээннээх дьон дьиэбитигэр тиийбиппит. Аҕабыт суоҕа. Сотору Уһун Уйбаан диэн ыалбыт киһи киирбитигэр омун-төлөн бөҕө буолан кыылбытын көрдөрбүппүтүн киһибит «Баара-суоҕа бүүчээни өлөрбүккүт. Нууччалыыта кабарга диэн», – диэбитэ. Ити курдук бүүчээнтэн куттанан, маска хонон турбуттаахпыт.
Маппый.
