Кини омос көрдөххө кэрэ сэбэрэлээх, уурбут-туппут курдук уһун дьылыгыр уҥуохтаах, баттаҕын нууччалардыы сырдатынан кырааскаланар кыыс этэ.
Биирдэ уопсайбытыгар улахан бырааһынньык буолла, бадаҕа, Өктөөп быһыылааҕа. Киэһээҥҥи үҥкүүгэ, мэлдьи да буоларын курдук, уолаттар Нууччалбаны үлтү кигэн Л-ҕа ускайдаатылар... Чэ быһата, Л. дэмин биэрэн ол киэһэни быһа Нууччалбалыын үҥкүү-битии, куустуһуу, тутуһуу-хабыһыы бөҕө буоллулар. Икки тэҥнээхтэр көрсүспүт дьоллоох дьоро киэһэлэрэ кырдьык-хордьук дьэ тосхойбута. Үҥкүүлээн илгистэ сылдьар дьоммут эмискэ сүтэн хаалбыттарыгар киммит эрэ кырдьык-хордьук билэ охсон «хоско бардылар» диэн сонунун үллэһиннэ.
Түүн ырааппытын кэннэ хоспутугар киирэн саҥардыы утуйан эрдэхпитинэ, Нууччалбабыт хос аанын тэлэйэ баттаан көтөн киирдэ, үөрбүтэ-көппүтэ, хараҕа чаҕылыйбыта сүрдээх. Биһи буоллаҕына үрдүгэр түһэн «хайа, хайдаҕый?» диэн үрүт-үөһэ өрүһүспүттүү ыйыталаспытынан бардыбыт. Нууччалбабыт арыылаах килиэби айаҕар толору симинэн олорон күлэн алларастыы-алларастыы, килиэп тоорохойдорунан тыбыыра олорон маннык кэпсээннээх буолла: «Па, кыыскыт кирэ бэрт эбит! Сордонон-муҥнанан тылбар киллэрэн, хараҥа хос булан сыгынньахтаан бардым. Арай чараас дьууппатын уһулан ылан муостаҕа бырахпытым «тос» гына тыаһаан тура кэлэн түстэ... Эбиитин сууллаары биэтэҥниир... Миэхэ уонна ити кыыс туһунан санатымаҥ даҕаны». Бүтүннүү кулгаах-харах иччитэ буолан олорбут хоспут иһэ чочумча иһийэн туран баран эмискэ сүр улаханнык күлэн тоҕо барбыттааҕа. Ол кэннэ, кырдьык, Нууччалбаны ким да Л-ҕа холбообот буолбута.
Кэлиин-кэлин Нууччалба: «Сордообуккут бэрдин иһин сымыйалаабытым, хоско киирэн чэй иһэ-иһэ кэпсэппиппит эрэ. Онно кини дойдутугар таптыыр уоллааҕын туһунан эппитэ уонна көннөрү доҕордоһуохха эрэ диэбитэ», — диэн кэпсээбитэ.
Л. үөрэҕин бүтэрэн, төрөөбүт дэриэбинэтигэр баар тапталлаах уолугар кэргэн тахсан мааны ыал ийэтэ буолан олорор сураҕа иһиллэр.
Суор Оноҕос.
