Булгуччулаах мэдиссиинэ страховкатыгар (ОМС) полистаах дьон бүтүн Арассыыйа үрдүнэн босхо мэдиссиинэ көмөтүн ылар бырааптаахтар. Эмтэнии ороскуотун ОМС Саха сиринээҕи территориальнай пуондата төлүүр.
«2024 сылга өрөспүүбүлүкэ тас өттүгэр страховкалаах дьоҥҥо 68 779 эмтэнии түбэлтэтэ баарын бэлиэтээтибит. Маны барытын харчыга таһаардахха, 600 мөл. солкуобайга тэҥнэһэр», — диэн пуонда оросчуоттуур-анаалыстыыр салаатын начаалынньыга Надежда Шишигина сырдатта.
Кини этэринэн, өрөспүүбүлүкэ олохтоохторо ордук элбэхтик Москуба куорат эмчиттэригэр (13,0%), Новосибирскай уобаласка (6,9%), Краснодарскай кыраайга (7,1%), Санкт-Петербург куоракка (6,6%), Иркутскай уобаласка (6,5%) уонна Амурскай уобаласка (6,4%) көрдөрбүттэр.
«Страховкалаах дьон ордук ис уорган (13,7%, 9234 түбэлтэ), тыынар уорган (13,5%, 9082 түбэлтэ) ыарыыларын, эчэйиини уонна хаан эргиирин мөлтөөһүнүн (9,0%, 6076 түбэлтэ), сүһүөх ыарыыларын (7,6%, 5132 түбэлтэ), туора эттик үөскээһинин (7,6%, 5114 түбэлтэ) уонна тымыр ыарыыларын (7,5%, 5032 түбэлтэ) көрдөрөллөр», — диэн кини быһаарда.
Онон, ааҕааччылар, өрөспүүбүлүкэ тас өттүгэр айанныаххыт иннинэ ОМС полискытын умнумаҥ, болдьоҕун бэрэбиэркэлээҥ. Болдьоҕо бүппүт буоллаҕына, туһааннаах ситимнэри туһанан эбэтэр страховкалыыр хампаанньаҕа тиийэн саҥардыҥ.
Сонун төрдө: ТФОМС Саха сиринээҕи пуондата
