Аллараа Халыма улууһун борокуратуурата холуобунай дьыала чэрчитинэн 58 саастаах олохтоох киһини буруйдуур акты бигэргэттэ. Эр киһи РФ ХК 258.1 ыстатыйатын 1 чааһынан буруйданар. Судургутук эттэххэ, РФ Кыһыл кинигэтигэр киирбит ураты сыаналаах уу биоресурсатын көҥүлэ суох бултаабытын, харайан сытыарбытын уонна атыылаабытын иһин. Ити туһунан СӨ борокуратуурата иһитиннэрэр.
Дьыала матырыйаалыгар сурулларынан, 58 саастаах эр киһи быйыл кыһын олунньуга-кулун тутарга Черскэй бөһүөлэгиттэн 50 килэмиэтирдээх сиргэ туох да көҥүлэ суох 245 хатыыһы бултаахтаабыт. Аны туран, онтун атын эрэгийиэн киһитигэр атыылаабыта, анараа киһи дойдулаан иһэн Таатта улууһун сиригэр тутуллубут.
Судаарыстыба бэрэстэбиитэллэрэ быһаарбыттарынан, 245 хатыыһы туппутун иһин судаарыстыбаҕа 117,9 мөлүйүөн солкуобайдаах хоромньу оҥоһуллубут.
Холуобуйнай дьыаланы Үөһээ Халыма улууһун суутугар ыыппыттар. Дьыала өссө көрүллэ илик.
