Киин куорат 3-с №-дээх полиция отделын дьуһуурунай чааһыгар күрүлүүр күнүс оскуола иһиттэн 59 тыһ. солк. суумалаах сиэп төлөпүөнүн аһаҕастык былдьаан барбыттарын туһунан иһитиннэрии киирбит.
Халабырдьыты өр-өтөр буолбакка полиция патруллуур сулууспата харатыттан харбаабыт. Халабырдьыт – урут сууттана сылдьыбыт, 18 саастаах Дьокуускай олохтооҕо.
Алын кылааска үөрэнэр оҕотун таҥыннара турбут аҕаттан халабырдьыт аһаҕастык төлөпүөн былдьаан баран атахха биллэрбит. Ырааппатах, халабырдьыт ир суолун сонно тута ирдээн, тараччы тутан ылан, холуобунай дьыаланы тэрийдилэр. Бу туһунан ИДьМ пресс-сулууспата иһитиннэрэр.
