Муус устар 9 күнүгэр Дьокуускайга "Пышная красотка" диэн этиргэн кэрэчээнэлэр күрэхтэрэ аан бастакытын буолан ааста. Ыалдьыттар ытыстарын дохсун тыаһынан киин куорат 5 кута-мата кыыһа Саида Феоктистова, Наталья Яркова, Светлана Нурова, Нина Вакуленко, Анна Пономарева күрэх 5 түһүмэҕин ситиһиилээхтик туораатылар.
Кыргыттар бэйэлэрин билиһиннэрдилэр, саалаҕа олорор ыалдьыттары кытта дьүүллүүр сүбэ сорудахтарын толордулар, чаҕылхай нүөмэрдэри туруордулар, "Спорт-шик" түһүмэххэ күүстэрин-уохтарын көрдөрдүлэр уонна Алексей Солдатов мааны куолаһынан доҕуһуолланан киэһээҥҥи таҥастаах хаамтылар. Маны сэргэ, кыттааччылары олохтоох эстрада артыыстара Артур Семенов, Ольга Гермагенова, Евгений Мухин уонна Оксана Чупикова дуэта өйөөтүлэр.
Урбаанньыттар Дарья Саввинова, Татьяны Ющенко, ырыаһыт уонна мусукаан Тима Дмитриевич састааптаах дьүүллүүр сүбэ кыайыылааҕы талыыга балай эмэ эрэйдэммит сурахтаах. Ол да буоллар, күрэх бүтүүтэ көрөөччүлэр куоластарынан уонна дьүүллүүр сүбэ түмүгүнэн "Көрөөччү биһирэбилин" уонна "Пышная красотка" Гран-притын хаһаайкатынан Саида Феоктистова ааттанна!
Күрэҕи Бырааһынньык Кисиэнньэ (Ксения Праздник) диэн айар ааттаах Ксения Громова толкуйдаан, тэрийэн ыыппыт. Бу күрэҕи кини сыл ахсын тэрийэр санаалаах.
Сонун төрдө: Ксения Громова
