1967 с. "Кыым" хаһыат тохсунньу 15 күнүнээҕи нүөмэригэр "Бухатыыр оҕо" диэн сонуҥҥа кэпсэниллибит 4 саастаах Миша Милюшкины эбэтэр кинини билэр дьону көрдөөн биллэрии таһаарбыппыт. Ол сарсыныгар биһигинниин Уус Майда улууһуттан төрүттээх дьон төлөпүөнүнэн кэпсэтэ сырыттылар.
Бастакынан сибээскэ Күп нэһилиэгиттэн Любовь Федоровна Апросимова таҕыста. Кини Миша Милюшкины улааппытын кэннэ Элдьикээҥҥэ сылдьан көрбүт.
«Мин көрдөхпүнэ ыйааһына 200 кг, уҥуоҕа 2 м кэриҥэ курдук этэ. Сүрэҕэ уҥа өттүгэр баар диэн кэпсииллэрэ. Кэнники куруусчутунан үлэлээбит, эдэр сааһыгар, отутун диэки дуу, ааһан баран дуу, сүрэҕэ ыалдьан олохтон туораабыт диэн истибитим», - диэн кини тугу билэрин кэпсээтэ.
Онтон Троицкай сэлиэнньэтиттэн Матрена Зосимовна Архипова эрийэн киниэхэ Миша Милюшкин хаартыскатын уонна кини туһунан урукку улуус хаһыатыгар тахсыбыт нууччалыы ыстатыйаны ыыппыттарын эттэ. Хаартыскаҕа көстөрүнэн, Миша бэйэтин саастыылаахтарыттан төһө эмэ улахан. Оттон ыстатыйа ис хоһооно оччотооҕу "Кыым" хаһыакка тахсыбыт сонуҥҥа майгынныыр эрээри, быдан сиһилии суруллубут.
Ол курдук, түөрт оҕолоох Милюшкиннар «Усть-Майский» сопхуос «Восьмой километр» учаастагар олорбуттар. Ийэлэрэ Евдокия Терентьевна, кэпсээбитинэн, Миша - үһүс оҕо. Балтараатыгар буут аҥаара ыйааһыннаах гиирэни чэпчэкитик көтөҕөр, түөрт сааһыттан аҕатыгар көмөлөһөр, уҥа уонна хаҥас илиитинэн олус түргэнник мас эрбэһэр, сатаан хайытар, умуһахтан биир биэдэрэ хортуосканы дэбигис таһаарар буолбут. Төрүөҕүттэн биирдэ даҕаны ыалдьыбатах. Улахан киһи курдук аһыыр, сороҕор топпокко эбии көрдөөн ылар. Ити кэмҥэ 48 р. ырбаахыны, 50 р. ыстааны кэтэр эбит.
Ити курдук бэйэтин кэмигэр улахан болҕомтону тардыбыт «бухатыырбыт» олоҕо, хомойуох иһин, кылгас буолбутун биллибит. Аламаҕай санаалаах Уус Майда далбар хотуттарыгар иһитиннэриилэрин иһин махтанабыт уонна өссө даҕаны саҥа чахчылары кэтэһэ хаалабыт.
Сонуннаах буоллаххытына, 8 (914) 820 09 75 нүөмэргэ суруйуҥ. Хаартыска, видео биһирэнэр.
Бэйэ кэр.
