Муус устар 4 күнүгэр «Сэргэлээх уоттара» култуура киинигэр үгэс буолбут «АРТиКУЛ» диэн ректор көрүүтэ түмүктэннэ. Кэрэхсэбиллээҕэ диэн бу тэрээһини устудьуоннар бэйэлэрэ тэрийсэллэр уонна манна ким баҕалаах кыттыан сөп.
Киин үлэһиттэрэ тэрээһин формАтын аныгы киэпкэ киллэрэн, хайысхаларын эбэн, устудьуон түһүлгэтэ ордук уоттанна-күөстэннэ, кыттааччыта элбээтэ. Ол курдук, барыта 300 кэриҥэ устудьуон үс күн устата аҕыс хайысханан күрэстэһэн, финалга киирэр, гала-кэнсиэргэ кыттар туһугар талааннарын көрдөрдүлэр, бэйэлэрин тургуттулар. Кинилэр талааннарын композитор уонна продюсер Семен Ченянов, саха эстрадатын артыыһа Сахамин, хомусчут Айсен Деллохов, проректоры солбуйааччы Саргылаана Нестерева, ырыаһыттар Invent, Кyn Sol уонна да атын биллэр-көстөр дьон сыаналаатылар.
Тэрээһин өссө биир кэрэхсэнэр өрүтүнэн устудьуоннары таһынан преподавателлэр эмиэ тэҥҥэ кытталлара буолар. Ол курдук, бары биир ситимҥэ киирэннэр бэйэ-бэйэлэрин чугастык билсэллэр, үөрэллэр-көтөллөр.
«АРТиКУЛ» ректор көрүүтэ устудьуон сиэр-майгы уонна култуура өттүнэн ситиһиитин көрдөрөр, ыччаты эстиэтикэҕэ иитиини тупсарар, социальнай өйү-санааны үөскэтэр сыаллаах ыытыллар.
Изольда ЯКОВЛЕВА, Киин айар бырайыактарын салайааччыта:
– Былырыын тэрээһин формАтын арыый уларытан «АРТиКУЛ» диэн ааттаабыппыт. Уонна устудьуоннарбыт ордук арыллан тахсалларын курдук, хайысхаларын элбэппиппит, номинациялары олохтуур буолбуппут. Педагог уонна уһуйааччы сылыгар «Устудьуон уонна уһуйааччы» диэн хайысханы киллэрбиппит. Успуонсардары кытта үлэлэһии эмиэ онно саҕаламмыта.
Онон, тэрээһиммитин үс күн устата ыытан, гала-кэнсиэргэ 20 тахса нүөмэри талан ыллыбыт. Дириэктэрбит Алексей Константинов бэйэтэ режиссердуур. Ити курдук уус-уран салайааччыбыт Анастасия Неустроева буолан барытын биир сүбэнэн тэрийэбит. Өссө биһиэхэ устудьуоннартан талыллыбыт «культоргтар» көмөлөһөллөр. Онон, түгэнинэн туһанан, тэрийсибит, сүүрбүт-көппүт оҕолорбутугар Василий Третьяковка (ИЕН), София Маркинаҕа (ИФ), Маайа Львоваҕа (ИЕН), Валерия Лукинаҕа (ИЕН), Аня Верховцеваҕа (ИЕН), Дайаана Жирковаҕа (ИФ), Коля Борисовка (ИЕН) уонна нүөмэрдэри киэргэппит «Кыталык», «Ситим», «Уран» ансаамбылларбытыгар махтанабыт.
«АРТиКУЛ» ректор көрүүтүн тэрийээччилэрэ уонна кыттааччылара успуонсардарга махтаналлар:
«МOST» мобильнай сыһыарыыга, «Камелек» хампаанньаҕа, «AiArt Studio» айар устуудьуйаҕа, «Timir Gym» фитнес-кулуупка, «Souratt» айар бөлөххө, «Nuer shop» тэрилтэҕэ
Ректор көрүүтүн кыайыылаахтарын наҕараадалыыр гала-кэнсиэри М.К. Аммосов аатынан ХИФУ устудьуоннара Марго уонна Тимур Егоров салайдылар. Кыайыылаахтары – ректор Анатолий Николаев, анал ааттары – проректоры үөрэх таһынан үлэҕэ уонна ыччат бэлиитикэтигэр солбуйааччы Саргылаана Нестерева эҕэрдэлээтилэр.
Уопсай зачет түмүгүнэн кыайыылаах таҕыстылар
I миэстэ – РФ Хотугу-Илиҥҥи норуоттарын тылларын уонна култуураларын института (ИЯКН СВ РФ), бириис – 100 тыһ. солк.
II миэстэ – Айылҕа билимин института (ИЕН), бириис – 50 тыһ. солк.
III миэстэ – Үп-экэниэмикэ института (ФЭИ), бириис – 30 тыһ солк.
«УСТУДЬУОН уонна УҺУЙААЧЧЫ» хайысхаҕа инженернэй-техническэй институт устудьуона Дмитрий Набережнай уонна дассыан Артем Набережнай бастаатылар. 3-с истиэпэннээх лауреаттарынан ИЯКН СВ РФ устудьуоннара, ассистена Лидия Григорьева уонна преподавателэ Александра Черепанова, ФЭИ преподавателлэрэ уонна устудьуоннара буоллулар. 2-с истиэпэннээх лауреат аатын Надежда Матвеева (ИЕН), преподаватель Алена Яковлева, Егор Лебедев (ИЯКН СВ РФ) сүктүлэр.
«ВОКАЛ» хайысхаҕа ГРФ устудьуона Иннокентий Черемкин бастаата. Эмиэ бу хайысхаҕа лауреат аатын ИЯКН СВ РФ устудьуона Ньургун Эверстов уонна ИТИ устудьуона Чарльз Бвуалья ыллылар. 3-с истиэпэннээх лауреатынан Увазие Даниель (АФ), Юрий Барабанскай (ИЯКН СВ РФ) буоллулар. 2-с истиэпэннээх лауреат – Мия Егорова (ИЯКН СВ РФ).
«ҮҤКҮҮ» хайысхаҕа филология факультетын устудьуоннара бастаатылар. 3-с истиэпэннээх лауреат аатын ИЕН, 3-с истиэпэннээх лауреат аатын ФТИ устудьуоннара сүктүлэр.
«ИНСТРУМЕНТАЛЬНАЙ» хайысхаҕа ИЯКН СВ РФ устудьуоннара Алексей Иванов уонна Чэмэлиинэ Атласова бастыҥ буоллулар. 3-с истиэпэннээх лауреат – Юрий Решетников (ИЕН), 2-с истиэпэннээх лауреат – Карина Николаева (ФЭИ).
«УУС-УРАН ТЫЛ» хайысхаҕа I истиэпэннээх лауреаттарынан Саина Шамаева (ИЕН) уонна Виктория Кожурова (МИ) буоллулар. 3-с истиэпэннээх лауреат – Анна Киприянова (ИЗФиР), 2-с истиэпэннээх лауреат – Айсена Яковлева (ИЯКН СВ РФ).
«УРАТЫ ЖАНР» хайысхаҕа Lione models хамаанда (ИЕН) бастаата. 3-с истиэпэннээх лауреатынан Сардаана Карзонова (ИТИ), 2-с истиэпэннээх лауреатынан Руслана Григорьева (ПИ) буоллулар.
«ВИДЕО» хайысхаҕа Николай Павлов (ИЕН) бастаата. 3-с истиэпэннээх лауреат Петр Афанасьев (ИЕН) уонна 2-с истиэпэннээх лауреат аатын Лев Алексеев (МИ) сүктүлэр.
«ХААРТЫСКА» хайысхаҕа Сергей Иванов (ИЗФиР) кыайда. 2-с истиэпэннээх лауреат аатын Кристина Потапова ылла.
Маны таһынан, тэрийээччилэр хас биирдии хайысхаҕа анал ааттары олохтоотулар. Онон, ускуустуба кэрэ эйгэтигэр угуйар, саҥа талааннары арыйар эдэр саас түһүлгэтэ «АРТиКУЛ» үтүмэн үөрүүнү бэлэхтээтэ, саҥа ааттары сүрэхтээтэ, эдэри-эмэни үрдүккэ-сырдыкка кынаттаата.
Тэрээһини сырдатта КҮНДЭЛИ.
