Өрүс арыллыбытынан сибээстээн, Хатастааҕы сибиинньэ комплексыттан сибиинньэ оҕотун ылаары куораттаатым. Аллараа Бэстээххэ сарсыарда 7 чааска тиийбитим. Били массыына туруорар 5 накопитель туолан, суолга турдубут. Биир накопитель массыына кэриҥэбит.
Пароммутун син кэтэһэн, 11 чаас саҕана туораатыбыт.
Хатаска ыстаннаран тиийэн, туох да бэртээхэй сибиинньэ оҕолорун көрөн, үөрүү буолла. Нууччалыы “боросуонак” буолбатах, “подсвинок” диэн үһү. Оробуочай уол инньэ быһаарда. “30 киилэҕэ диэри ыйааһыннааҕы ыллаххына, сыаната киилэтэ 450 солк. буолар. Оттон 30 кг ыйааһыннааҕы атыыластаххына, 350 солк., кыра барыстаах буолар” диэн сүбэлээтэ. Олох сөпкө эттэ.
“Чэ, оччоҕуна 30 киилэттэн тахсалааҕы тутан кулу” диэбиппэр, уолум сүүһүнэн сибиинньэ ортотуттан хараҕынан көрөн: “Бу 30 киилэттэн тахсара буолуо”, – диэн, биири кутуругуттан харбаан ылла.
Мин “Нивабынан” биир эрэ куллаах, олох бэлэмэ суох киирбит эбиппит. Онон, сибиинньэбит куулбар баппата. Инньэ гынан киһим улахан куулу булан аҕалбытыгар, хата, толору киирэн хаалла. Дьигинэн, мас дьааһык оҥостон үөһээ багажникпар ууран кэлиэх баар эбит. Суох.
Хайыамый, солуонум иһинээҕи багажникпар уктум уонна төттөрү барыы буолла.
Сайыммыт сылааһа сүр – +20 кыраадыс. Сибиинньэм Даркылаах кытылыгар буһан-итииргээн суккуруур тыына эрэ тиийээхтээтэ. Багажникпын арыйбытым, айаҕыттан күүгэн бөҕө тахсыбыт, аҕылыы аҕай сытар эбит. Куулуттан төбөтүн аҥаара быкпыт. Уочарат буолунай.
Эмиэ 4 чаас накопительгэ турдум. Кэлин ыксаан багажникпын арыйдым, сибиинньэм дьэ уоскуйан аҕалыыра тохтоото.
Аны, сиргэ түһэн куотуо диэн биир куттал. Хата киһиҥ олохтоох миэстэбин буллум диэн хам бааччы сытан абыраата. Дьэ өйдөөх кыыл эбит. Мин тахсыбатын билэн, массыынабар олорон абыранным. Паромҥа киирэн киһим өссө утуйан буккуруур. Уолаттар көрөн сөҕөллөр. Мин олох да кыһаммат буоллум.
Саха уолаттара сүрдэммиттэр. Эмиэрикэ таһаҕас тиэйэр араас улахан массыыналарыгар олорон, ыраах сиринэн тэлэһийэн иһэллэр эбит.
Владивостоктан иһэр “Хайстаах” уолаттар бааллар. Миигин, оҕонньору көрөн, кэпсэтэллэр. Эргэ тиэрмэспин сонурҕууллар. Сааһыран эрэр киһи тэрилим да сааһырбыт эбит. Төрөппүт оҕолорум тэҥэ саастаах ыччаттар үлэлии-хамсыы, сүүрэ-көтө сылдьалларын астына көрөҕүн.
Инньэ гынан куоратчыт дьиэбин киэһээ этэҥҥэ булан, санаабын ситэн, 13 тыһыынчаҕа “подсвинок” атыылаһан, ынахтарым үүттэрин сэппэрээтэрдээн туһаҕа таһаарар буоллум. Тыа киһитэ оттон-мастан тардыһан иннин көрүннэҕинэ сатанар.
