“Дьокуускайга үлэлиир Уһун үйэлэнии киинин туһунан дьүөгэбиттэн истибитим. Кэргэмминиин онно оҥоһуллар өҥө сыанатын, хаачыстыбатын биһирээбиппит”, – диир Муома улууһун Хонуу бөһүөлэгин 76 саастаах олохтооҕо Виктория Ивановна Сокорутова. Уһун үйэлэнии киинигэр аҕам саастаахтарга доруобуйа туругун олоччу көрдөрүнэргэ, уопуттаах эмчиттэртэн сүбэни ыларга, эмтэнии кууруһун баран, доруобуйаны бөҕөргөтүнэргэ, ону тэҥэ биир саастыылаахтары кытта алтыһарга, бириэмэни бары өттүнэн туһалаахтык атаарарга толору кыах бэриллэр.
Виктория Ивановна Уһун үйэлэнии киинигэр бу дьыл бэс ыйын бүтүүтэ кэлбитэ. Олоҕун аргыһа Ньургустан Афанасьевич Корякинныын кииҥҥэ атаарбыт уон күннэрин астына ахталлар.
– Кэргэним 60 саастаах. Отуттан тахса сыл иллээхтик, эйэлээхтик олоробут. Санкт-Петербурга сиэммитигэр сылдьан кэллибит. Кини үрдүк үөрэх кыһатыгар бакалавриаты бүтэрэн, үөрүүбүт улахан. Бэйэбит Муома Хонуутугар олоробут. Мин биэнсийэҕэ тахсыахпыттан оҕуруот олордобун. Оттон кэргэним үлэ уруогун учууталынан үлэиир. Саастаах дьоҥҥо аналлаах үчүгэйкээн киин баарын туһунан дьүөгэбиттэн истээт, хамсанарга быһаарыммытым. Дьокуускайга баар кэммэр тииспин эмтэтэр былааннааҕым. Оҕолорбут Мархаҕа олороллор, кыыһым Сочига сынньана барбыта. Марха уонна куорат икки ардыгар айанныыр сылаалааҕын иһин Уһун үйэлэнии киинигэр киирэр табыгастааҕын өйдөөбүтүм. Уонна сыыстарбатахпыттан үөрэбин. Киһи санаата сытар, чахчы сынньанар уонна сэргэхсийэр сирэ эбит! Наһаа минньигэстик аһаталларын таһынан доруобуйабытын да бөҕөргөттүлэр. Онно эбии култуурунай бырагыраамалаахтар. Ол барыта - биэнсийэ кээмэйин иһинэн! Итиччэ элбэх өҥө иһин сууккаҕа 3 эрэ тыһ. солк. төлүүр диэн билиҥҥи үйэҕэ босхону үрдүнэн буоллаҕа. Биһиги Островскай уулуссатыгар баар кииҥҥэ сынньанныбыт. “Октябрьскай уулуссатыгар баар кииҥҥэ усулуобуйата өссө үчүгэй” дииллэр. Ону эмиэ болҕомтоҕо ылабыт.
Уһун үйэлэнии киинин үлэһиттэригэр ситиһиини уонна дьон туһугар үлэлиир социальнай бырайыагы бырабыыталыстыба өйүүрүгэр баҕарабыт. Ханнык да дойдуга, уопсастыбаҕа кырдьаҕастар ытыктабылга сылдьаллар. Норуот көһөҥө баайын, тирэх көлүөнэтин туһугар ыытыллар үлэни өрөспүүбүлүкэ салалтата болҕомто таһыгар хаалларымыан наада. “Аврора” килииньикэ бары исписэлиистэригэр, Уһун үйэлэнии киинин үлэһиттэригэр үтүө, кыһамньылаах сыһыаннарын, хаачыстыбалаах үлэлэрин, саастаах дьоҥҥо тэрийбит эйгэлэрин иһин истиҥник махтанабыт!
Киин үлэтин туһунан сиһилии 89142710088 нүөмэргэ эбэтэр https://centr-dolgoletia.ru/kontakty/ билсэн, суруйтарыахха сөп. Телеграм-ханаал сыылката: https://t.me/cadykt14
