Ааспыт өрөбүл, атырдьах ыйын 25 күнүгэр, Дьокуускай куорат “Amore” баҥкыаттыыр саалатыгар, Саха сирин айаны таптааччыларын, туристарын ортотугар улахан биһирэбилин ылбыт “ТУРБЕРИ” туристыыр агентство тэриллибитэ 6 сылын үрдүк таһымҥа бэлиэтээтэ.
Баҥкыаттыыр саала иккис этээһигэр тахсабын. Дьон-сэргэ кэлитэлээбит. Үгүстэрэ араас омук көстүүмнэрин кэтэ сылдьалларын сэҥээрэ, манньыйа көрөбүн. Бу буоллаҕа – норуоттар доҕордоһууларын дьиҥнээх бырааһынньыга. Көстүүмнэринэн көрөн, ким хайа дойдуну көрдөрөрүн таайаҕын. Бастакынан хараҕым иккис дойдум буолбут Узбекистаным национальнай көстүүмүгэр хатанар. Кэпсэтэн билбитим, быйыл саас Узбекистаҥҥа бөлөҕүнэн сылдьан, күүлэйдээн кэлбиттэр. Хаачыстыбалаах солко матырыйаалынан тигиллибит, омуктарын оһуора ойууламмыт халааты кэтэ сылдьаллар. Ол быыһыгар хаһаах, кэриэй, дьоппуон, эгиипэт, ииндийэ, о.д.а. омуктар араас дьэрэкээн өҥүнэн кытыастар, толбоннурар көстүүмнэриттэн саала иһэ күлүмүрдээн олорор.
Бу күн Турция куораттарыгар 50%-наах чэпчэтии көрүлүннэ
Юлия ДОРОФЕЕВА, “ТУРБЕРИ” туристыыр агентство салайааччыта:
– Быйыл тэриллибиппит 6-с сылын бэлиэтээн килийиэннэрбитигэр, үлэһиттэрбитигэр уонна биһигини кытта үлэлэһэр партнёрдарбытыгар анаан бырааһынньык тэрийдибит. Бүгүҥҥү күммүт сүрүн “фишката” – бу күн Турция: Анталия–Памуккале–Каппадокия хайысханан туур атыыласпыттарга анаан 50%-наах чэпчэтии буолар. Онон бүгүн 16 000 солк. эрэ путевка атыылаһар кыахтаналлар. Үс сыл иһигэр хаһан баҕарар барыахтарын сөп.
Бу сыллар устата биһиги агентствобыт Монголия, Япония, Австралия, Кэриэйэ, Казахстан, Узбекистан, о.д.а. дойдуларга туристары сырыттыннарда. Инникитин Новай Зеландия, Филиппин, о.д.а. дойдулар кэтэһэллэр. Былааммыт элбэх. Онон дьоммутун-сэргэбитин олоххутугар элбэх айаны, сонун сирдэри көрө биһигини кытта айанныыргытыгар ыҥырабыт.
Матрена ОСИПОВА, Дьокуускай куорат олохтооҕо:
– Былырыын 2023 сылга 5 сылын бэлиэтиир тэрээһиннэригэр сылдьаммыт, 50%-наах чэпчэтии оҥорбуттарыгар туур атыыласпыппыт. Онно 12 000 суумалаах путевканы ылбыппыт уонна быйыл кулун тутарга 4 дьүөгэ буоламмыт Турция Анталия–Памуккале–Каппадокия куораттарынан нэдиэлэ кэриҥэ күүлэйдээн кэлбиппит. Кыргыттарбытыныын бары эрдэттэн барар кэммитин болдьоһон, уоппускабытын ылан бу агентствонан сырыттыбыт. Баларга үчүгэйэ диэн “отстрочка тура” диэннээхтэр, онон наһаа табыгастаах. Дуогабар 3 сыл болдьохтоох, бу кэм устата хаһан баҕарар күүлэйдии барыаххын сөп. Быйыл эмиэ кэллибит. Сэҥээрбит туурбут баар буоллаҕына, айанныыр былааннаахпыт.
Саргылана АРГУНОВА, Дьокуускай:
– Бу хампаанньаны 2019 сылтан билэбин. Ол сыл алтынньытыгар бөлөҕүнэн элбэх буолан олус үчүгэйдик, удамыр сыанаҕа күүлэйдээн кэлбиппит. Оччолорго кинилэр Турция судаарыстыбаннай хампаанньатын кытта бииргэ үлэлиир кэмнэрэ этэ. Гид-тэрэ билиилээх, нууччалыы үчүгэйдик, интэриэһинэйдик кэпсиир уолаттар түбэспиттэрэ. Кинилэр кэпсээннэриттэн, дойдуларын устуоруйата дириҥин, былыргытын истэн сүрдээҕин сөхпүппүт.
Алтынньыга барар олус үчүгэй эбит этэ. Күнүһүн итии, киэһэ 5–6 чаастан сөрүүдүйэн барар, олох “комфортнай” усулуобуйа. Үгүс киһи дьыл маннык кэмин сөбүлүүрэ буолуо дии саныыбын. Бүгүн кэргэним Степанныын кэлэн олоробут. Көрүөхпүт, истиэхпит, баҕар, эмиэ туур ылыахпыт. Урут Турция эрэ буоллаҕына, билигин хайысхалара элбээбит. Ол курдук, Малайзия, Филиппин, Япония, Австралия, Кэриэйэ, Узбекистан, о.д.а. хайысхалар бааллар.
Семён СТАРОСТИН, Кэбээйи, Сиэгэн Күөлүттэн сылдьар:
– Быйыл бу агентствонан тохсунньу ыйга Турцияҕа баран кэлбиппит. Аҕыйах хонуктаах бырагыраамалара киэҥ ис хоһоонноох буолан, сири-дойдуну астына көрдүбүт-иһиттибит. Каппадокия киһи тылынан кыайан эппэт кэрэтэ, 5 сулустаах отеллэр үчүгэйдэрэ... Инникитин син биир кинилэр өҥөлөрүн туһаммыт киһи диэн санаалаахпын.
Ньургустаана Нюргусова, Ньурбаттан төрүттээх:
– Дьүөгэбит Милияна “Турбери” агентствоны булан, бииргэ устудьуоннаабыт 4 кыыс буоламмыт икки төгүл сырыттыбыт. Былырыын Бүлүүтээҕи педучилище үбүлүөйдээх сылыгар анааммыт, Монголияҕа төрдүө буолан баран кэлбиппит. Онно бэркэ сылдьыбыппыт. Гоби кумах куйаарын көрөн астыммыппыт, юртаҕа хоммуппут. Тыыннаах тэбиэннэри илэ көрөн, сөҕүү-махтайыы бөҕө. Онон туһугар туһалаах “познавательнай” туур буолбута. Бу – мин омук сиригэр 15-с дойдубар сылдьыым.
Онтон быйыл муус устар ыйга 18 киһилээх бөлөх Арассыыйа быыбарын саҕана Узбекистаҥҥа Ташкент–Самарканд–Бухара хайысханан баран кэллибит. Биһигини агентство үлэһиттэрэ Виктория Кононова уонна Оля Сергучева илдьэ сылдьыбыттара. Самарканд куоракка сырыыбыт Арассыыйа быыбарын күнүгэр сөп түбэһэн, онно быыбардаабыппыт. Ол устуоруйаҕа хаалар эриэккэс түгэн буолбута.
Былыргы оҥоһуулаах куораттары көрөн астынан бөҕө кэллибит. Тус бэйэм Бухараны наһаа сөбүлээтим. Куорат дьиҥнээх былыргы бэйэтинэн уларыйбакка турара сөхтөрдө. Былыр манан “Улуу солко суола” ааһар сирэ эбит. Самарканд арыый аныгы истииллээх эбит диэн көрдүбүт. Онон Узбекистан 16-с дойдум буолла. Сылдьыбыт бырагыраамабыт олус үчүгэйдик таҥыллан оҥоһуллубут этэ. Аны түспүт отеллэрбит, эчи, үчүгэйдэрин. “Турбери” үлэһиттэрэ Самарканд куоракка оптуобуспутугар киирэн олордохпутуна, хас биирдиибитигэр салапааҥҥа угуллубут сюрпризтарын бэлэх ууммуттара. Көрбүппү-үүт: араас дьэрэкээн өҥнөөх узбек омук национальнай солко халааттара эбит. Үөрүү-көтүү, соһуйуу-өмүрүү бөҕө буоллубут.
Бу сырыыга күн киирбэт дойдутугар, Японияҕа, барар санаалаах тэрээһиҥҥэ кэллибит.
Алена ЯДРЕЕВА, блогер:
– Быйыл 7 саастаах кыыспыныын “турберилары” кытта Японияҕа 18 буолан баран кэлбиппит. Олус кэтэһиилээх туур буолбута. Оҕобун кытары аан бастакы айаммыт. Япония–Кэриэйэ–Кытай дойдуларынан сылдьыбыппыт. Олох “эмоция” бөҕөнү ылбыппыт. Кэриэйэни наһаа сөбүлээбиппит. Астара минньигэһэ... Онтон Япония аныгылыы дойду эбит эмиэ астыммыппыт. Кытайга “ааһан иһэн” диэбит курдук, сылдьан ааспыппыт.
Уопсайынан, маннык бэлэм туурунан сылдьар олох үчүгэй эбит дии санаатым. Барыта бэлэмҥэ сылдьаҕын. Бу иннинэ дьиэ кэргэнинэн төрдүө буолан “дикарем” сылдьааччыбыт. Онно барытын “ханна барбыт, хайдах сылдьыбыт киһи” диэн толкуйдуугун, күүрэн, тыҥаан баран сылдьаҕын. Барытын эрдэттэн буруонньа сакаастыыгын. Онтон маннык туурунан сылдьарга төбөҥ ыалдьыбат, барыта бэлэм. Манна ордук ийэ оҕотунуун сылдьара астык.
Кэлэр сыл олунньутугар “турберилары” кытта Австралияҕа барар былааннаахпын. Биир бөлөх 16–18 киһилээх туур туолан кэриэтэ турар.
Александра АТЛАСОВА, Дьокуускай куорат:
– Быйыл бэс ыйыгар “Турбери” агентство ыыппыт аахсыйатыгар уолум 70%-наах чэпчэтиилээх путевканы Турцияҕа баара–суоҕа 9000 солк. сүүйбүтэ. Онон балаҕан эбэтэр алтынньы ыйдарга барарга былааннанабыт. Махталбыт бэлиэтин “турберилар” төрөөбүт күннэрин үллэстэ кэллибит.
Лилия ФЕДОТОВА, Үөһээ Бүлүү Тамалакаан орто оскуолатыгар учууталлыыр:
– Былырыын 5 сыллаах тэрээһиннэригэр эмиэ сылдьан турабын. Онон тапталлаах агентством төрөөбүт күнүн, үөрүүтүн-көтүүтүн үллэстэр миэхэ үгэскэ кубулуйда. Онно 12000 солк. эрдэҕинэ туур атыыласпытым. Болдьоҕо уһун буолан, быйыл, дьэ, Турцияҕа Саҥа дьылга барардыы былааннанабын.
Галина Шадрина, биэнсийэлээх:
– Хаҥаластан төрүттээхпин. Бүгүҥҥү үөрүү-көтүү бырааһынньыгар кэлэн олорорбуттан астынабын. Тэрээһин үрдүк таһымнаахтык ыытылынна. Сиэн кыыспын кытта национальнай көстүүм күрэҕэр кыттан, босхо путевка сүүйэн дьоллоннубут. Онон бириэмэтинэн көрөн, сиэммин кытта Турцияҕа барыахпыт. Үс сыл болдьохтоох буолан табыгастаах эбит: хаһан баҕардаххына барыаххын сөп.
Антонина СЕМЕНОВА, биэнсийэлээх, өрөспүүбүлүкэтээҕи педагогическай үлэ бэтэрээннэрин сэбиэтин чилиэнэ:
– Биэнсийэҕэ олорор буоламмын, айанныырбын олус сөбүлүүбүн. “Турбери” хампаанньаны кытта саҥа билистим. Биллэриилэрин социальнай ситимҥэ көрөн интэриэһиргээбитим. Аҕыйах хонуктааҕыта дьүөгэм Леналыын Ленин бэрэспиэгинэн баран иһэбит. Таһырдьа сайыҥҥылыы куйаас күн турара. Ол истэхпитинэ, арай 5–6 массыына тирилэһэн аастылар. Биһиги өссө байыаннай-муора флоттара сылдьаллар дии санаатыбыт, былаахтаахтар иҥин. Онтон өйдөөн көрбүппүт, бары “Турбери” диэн суруктаах былаахтара массыына иһиттэн тэлибирээн аҕай иһэр. Онно харахпыт хатанна уонна “Тыый, наһаа үчүгэй туристическай фирма баар эбит дии!” – диэн интэриэһиргээтибит аҕай.
Дьэ уонна туризмы сайыннарарга олус көхтөөхтүк, эрчимнээхтик үлэлиир тэрилтэ баар эбит диэн бэҕэһээ офистарыгар (24.08.24) бара сырыттыбыт. Субуотаҕа үлэлээбэттэрэ буолуо диэн сэрэхэдийэ-сэрэхэдийэ, киирэн кэллибит. Арай утары биһигини икки эдэркээн, кырасыабай уол көрүстүлэр. Бу – Турция аатырар сэрийээллэригэр оонньуур биллиилээх киинэ артыыстара. Кинилэр “Эйигин Турцияҕа кэтэһэбит” диэн суруктаах билбордарын көрөн наһаа үөрдүбүт, настарыанньабыт олус көтөҕүллэн хаалла (билборду ыйан көрдөрбүтүгэр, күлсүү бөҕө буоллубут).
Аны офистарын иһигэр барыта эп-эдэркээн ыччаттар олороллор. Киирээппитин кытта, биир эдэркээн кыыс көрүстэ. Бары, эчи, эйэҕэстэрин, аламаҕайдарын. Истиҥ баҕайытык сааһылаан, сиһилии кэпсээн биэрдилэр. Нөҥүө күн төрөөбүт күннэрин бэлиэтээри сылдьалларын биллибит уонна бу кэлэн турабыт.
Путевка сүүйүүтэ эрэ буолбакка, аан дойду норуоттарын традиционнай көстүүмүн кэтэн кэлбиттэргэ анаан путевка эмиэ оонньонор эбит. Дьиҥинэн, кытай көстүүмнээхпит ээ. Бэйдайхэҕэ бара сырыттахпытына бэлэхтээн ыыппыттара. Онон кэлэр сылга тэрээһиннэригэр көстүүмнээх ох курдук оҥостон кэлииһибит диэн сананныбыт.
Өйүүн барар (28.08.24) бөлөҕү кытта барыахпытын баҕарбыппыт да, чэпчэтиилээх билиэт суох эбит. Биһиги, биэнсийэлээх дьон, чэпчэтиилээх билиэтинэн эрэ айанныыр кыахтаахпыт. Онон маттыбыт. Аны чэпчэтиилээх билиэт көһүннэҕинэ, барардыы былааннанныбыт. Турцияҕа Каппадокия диэни иһиттэхпинэ, тус бэйэм олох сүрэҕим тэлибириир, сүрдээҕин ымсыырабын. Бүгүҥҥү тэрээһиҥҥэ кэлэн аан дойдуну барытын көрдүбүт, билистибит. Кэриэйэттэн саҕалаан Соҕуруулуу Илиҥҥи Азияны бары көрдөрө тураллар. Онон билигин мантан биһиги ыра санаалаах барабыт: хайдах эмэ чэпчэтиилээх сөмөлүөт билиэтигэр түбэһэн, аан дойдуну баран көрбүт киһи диэн...
Сүрүн бириис кыайыылаахтара
Дьэ, бу курдук “ТУРБЕРИ” туристыыр агентство тэриллибитэ 6 сылын бэрт үрдүк таһымҥа бэлиэтээтилэр. Бу күн кинилэр үөрүүлэрин үллэстэ Дьокуускай куораттан эрэ буолбакка, улуустартан, тыа сириттэн эрэллээх килийиэннэрэ, айанньыттара кэлэн үөрүүлэрин үллэһиннилэр, санааларын этиннилэр. Онтон Турцияҕа барар сүрүн бирииһи сүүйбүттэр өрөгөй үөрүүтүн биллилэр. Любовь Ядрихинская “Кэриэйэҕэ “по чекапу” туур тэриллиэн наада” диэбитин мустубут дьон, тэрийээччилэр сэҥээрэ иһиттилэр. Тэрээһин кэмигэр Турцияҕа 8 күннээх, 7 түүннээх туурга аһаҕас күнүнэн-дьылынан 30-ча киһи дуогабар түһэристэ. Онон 3 сыл иһигэр хаһан баҕарар баран кэлиэхтэрин сөп.
Саргылаана БАГЫНАНОВА.
