Балаҕан ыйын 13 күнүгэр Пекин куоракка Арассыыйатааҕы норуоттар доҕордоһууларын университетын (РУДН) кытта Кытай төрүт мэдиссиинэтин госпитала кэмпириэнсийэ тэрийдилэр уонна хардарыта үлэлэһии туһунан сөбүлэһии түһэристилэр.
Ол туоһутунан Дьокуускай куорат олохтооҕо, БРИКС эспиэрэ, рефлексотерапевт, ТКМ ньыматынан чэбдигирии исписэлииһэ, Илиҥҥи мэдиссиинэ аан дойдутааҕы оскуолатын исписэлиистэрин ассоциациятын кыттыылааҕа, эбээн удьуор эмчитэ Өлүөнэ Ый Хотой буолла. Кини бу тэрээһиҥҥэ Саха сириттэн соҕотоҕун кытынна.
Өлүөнэ иһитиннэрбитинэн, кэмпириэнсийэ бочуоттаах ыалдьыттарынан РУДН бастакы проректора Андрей Костин, Илиҥҥи мэдиссиинэ аан дойдутааҕы оскуолатын исписэлиистэрин ассоциациятын бэрэсидьиэнэ Хуан Гуоронг буолбуттар. Пекиҥҥэ уопут атастаһа уонна үөрэнэ Арассыыйаттан Кытай төрүт мэдиссиинэтин 19 исписэлииһэ кэлбит. Үөрэтии Фэнтай госпиталыгар ыытыллыбыт.
Сонун төрдө: https://yakutia24.ru
