Ахсынньы 1 күнүттэн дойдубут олоҕор-дьаһаҕар кэккэ уларыйыылар киириэхтээхтэр. Холобур, Арассыыйаҕа киирэр омук дьоно эспэримиэн быһыытынан биометрияларын туттарыахтара, анал байыаннай дьайыы кыттыылаахтарын иэстэрин сотуохтара, оҕото-уруута суох көҥүл сылдьыыны көҕүлүүр-угуйар дьону ботуччу ыстарааптыахтара, о.д.а.
Аармыйа кэккэтэ хаҥаата
Ахсынньы 1 күнүттэн Арассыыйа сэбилэниилээх күүстэрин штата (гражданскай персоналы ааҕан туран) 2 389 130 киһиэхэ тиийэ хаҥаата. Байыаннадар ахсааннара 1 500 000 киһи буолла (+180 000). Анал ыйааҕы бэрэсидьиэн В.Путин өссө балаҕан ыйыгар таһаарбыта.
АБДь кыттыылаахтарын кирэдьииттэрин сотоллор
Украинаҕа анал байыаннай дьайыыга кытта сылдьар дьон 10 мөл. солк. диэри суумалаах кирэдьииттэрин иэһин кыайан төлөөбөт эбэтэр төлүүр болдьохторун куоттаран эппиэтинэскэ тардыллар түгэннэригэр, сотуохтара. Чопчулаатахха, 2024 с. ахсынньы 1 күнүгэр диэри суут быһаарыытынан иэстэрэ тутуллар буолбут уонна “исполнительнай производство” көбүтүллүбүт эрэ дьон кирэдьиитин сотуохтара. Ол иһигэр мобилизацияламмыттар, 2024 с. ахсынньы 1 күнүттэн РФ сэбилэниилээх күүстэрин кытта хантараак түһэрсибиттэр, байыаннай училищелар уонна үрдүк үөрэх кыһаларын курсаннарыттан ураты атын ыҥырыллыбыт дьон (призывниктар). Бу саҥа уларыйыыга АБДь кыттыылаахтарын ойохторо эмиэ киирэллэр. Итини таһынан, ахсынньы 1 күнүттэн АБДь кытыылаахтара “исполнительнай сбор” төлөбүрүттэн эмиэ босхолоннулар.
Биометрия эспэримиэнэ
Ахсынньы 1 күнүттэн дойдуга саҥа “пилотнай” бырайыак үлэлээтэ. Ол чэрчитинэн, омук дойдутун олохтоохторо уонна гражданствота суох дьон Арассыыйа кыраныыссатын туоруулларыгар биометрия дааннайдарын туттарыахтара. Эспэримиэн 2026 с. бэс ыйыгар диэри үлэлиэхтээх.
VPN угуйуга
Ахсынньы 1 күнүттэн VPN-сиэрбистэри оҥорор туһунан информация бобуллар. Анал бирикээһи Роскомнадзор сэтинньигэ таһаарбыта.
Кэнсиэрбэни маркировкалыыллар
Ахсынньы 1 күнүттэн балык, уу үөнүн-көйүүрүн, ууга үөскүүр үүт аһылыктаахтар уо.д.а. кэнсиэрбэлэрэ булгуччу маркировкаланар буолаллар. Онтон кулун тутартан эт, сүөһү иһин-үөһүн, оҕуруот аһын уонна фрукта кэнсиэрбэлэрэ булгуччу маркировкаланыахтара.
Алмаас уонна бирилийээн экспорда
Күндү металлар уонна таастар судаарыстыбаннай пуондаларыттан айылҕа алмааһын уонна бирилийээнин мантан антах экспорка судаарыстыбаннай унитарнай эбэтэр судаарыстыбаннай тэрилтэлэр эрэ таһаарар буолуохтара. Урут онон “Алмазювелирэкспорт” АУо дьарыктанара.
Чайлдфри пропагандатын иһин – ыстараап
Ахсынньы 4 күнүттэн бэчээккэ, угуйукка, интэриниэккэ уонна киинэҕэ оҕото-уруута суох көҥүл сылдьыыны көҕүлүүр эбэтэр оннукка угуйар дьону да, тэрилтэлэри да (чайлдфри) ыстарааптыыр буолуохтара. Өскөтүн оннук суруйуу саайка таҕыстаҕына, ону Роскомнадзор бобуулаах информация кэлим реестригэр киллэриэҕэ. Оттон ыстараап маннык буолуо: биирдиилээн дьон – 400 000 солк., дуоһунастаах дьон – 800 000 солк., тэрилтэлэр – 5 000 000 солк. тиийэ.
СИЗО-ҕа уһун сибидээнньэ
Ахсынньы 20 күнүттэн СИЗО-ҕа хаайылла сытар дьон аймахтарын кытта өр көрсөллөрө көҥүллэнэр буолуо. Анал сокуоҥҥа бу сайын дойду бэрэсидьиэнэ В.Путин илии баттаабыта. Санаттахха, билигин СИЗО-ҕа хаайылла сытар дьоҥҥо уһун болдьохтоох сибидээнньэ көҥүллэммэт.
