Сыл аайы Илиҥҥи гороскуоп аан дойду дьонун өйүн-санаатын өрүкүтэр. Бары эһиилги сыл бэлиэтэ туох кыыл буоларын сураһаллар, ол кыыл майгытын, сыл уонна зодиак бэлиэлэригэр хайдах дьайыахтааҕын таайа сатыыллар.
2025 сыл – күөх дьүһүннээх мас моҕой сыла. Өскөтүн Дьобуруоба, Аан Илин уонна Арҕааҥҥы Азия омуктарыгар моҕой (эриэн үөн) туох да үчүгэйэ суох өйдөбүллээх харамай буоллаҕына, илиҥҥи омуктарга кини муудараһы, холку майгыны, нарын-имигэс буолууну бэлиэтиир.
Майгыта-сигилитэ
Моҕой муударай, мындыр, өтө көрөр уонна булугас өйдөөх, чуор, сэрэхтээх, сороҕор кутталлаах харамай. 2025 сыл – кини сыла. Киһи саллар харамайа. Ол гынан баран, онтон куттанар табыллыбат. Кытай номохторугар кини мэлдьи аптаах-алыптаах үтүө көмөлөһөөччү уонна эрэллээх доҕор быһыытынан кэпсэнэр. Саамай сүрүнэ – кинини ытыктыахха, санаатын табыахха наада. Ол иһин кинини мэлдьи Хотун дииллэр.
Кытай астрологтара этэллэринэн...
– Моҕой Хотун хаһан даҕаны киһиэхэ бастакынан саба түспэт. Ол аата, кыынньаабатаххына уонна кыыһырдыбатаххына – куттала суох.
– Күүһүн-кыаҕын, таһымын бэркэ билэр. Кинини сэмэлиир, дьүүллүүр, сыана быһар табыллыбат. Бу сыл кыбыстар, саатар, кэмчиэрийэр майгыгытын уларытыахтааххыт, күүскүтүн-кыаххытын, дьоһуҥҥутун (достоинство) билиниэхтээххит.
– Уһулуччу буоларга дьулуһар. Кытай гороскуобар ахтыллар күөх дьүһүннээх харамайдар бары үүнэр-сайдар, айар-тутар дьүккүөрдээхтэр.
– Куһаҕаны умнубат эрээри, бырастыы гынар. Моҕой Хотун тугу эрэ алҕаһыан сөп эрээри, хаһан даҕаны иккистээн киирэн биэрбэт. Онон сэрэхтээх буолар ирдэнэр.
– Сатаан сиэртибэлиир, толук биэрэр. Кини мындыр уонна муударай буолан, улаханы, суолталааҕы уонна сыаналааҕы тутан хаалар туһугар, кыраны сиэртибэлиэн, биир тылы булуон сөп.
Ситиһиини тардар туом
Моҕой Хотун дьиэҕэ-уокка ситиһиини уонна табыллыыны тардар туспа туома баар.
Бастатан туран, туһата, наадата суох, алдьаммыт, эргэ малы-салы быраҕан, дьиэ салгынын чэбдигирдиллиэхтээх. Сэнэх эбэтэр саҥа эрээри, олох туттуллубакка турбут малы аһымал тэрилтэтигэр бэриллиэхтээх, оннукка Моҕой ордук үөрүөхтээх.
Иккиһинэн, элбэх үүнээйини олордуллуохтаах. Сайын оҕуруокка буоллун, кыһын дьиэ иһигэр буоллун. Тоҕо диэтэххэ, Моҕой Хотун үүнээйи хаххалыыр күлүк уонна сөрүүн сиригэр сытан сынньанар.
Сулустар хайдах дьайалларый?
2025 с. – уларыйыы-тэлэрийии сыла. Зодиак бэлиэлэригэр барыларыгар саҥа суол арыллыа. Олох тосту уларыйар кэмнэрэ кэлиэхтэрэ. Чуолаан Кураан Чолбоно (Марс), Чолбон (Венера) уонна Мэндэҥэ (Меркурий) ретроградтарын кэмигэр.
Ардыгар булугас, кыратык киитэрэй, аһаҕас буолуохха наада. Уран (планета) Игирэлэрдиин алтыһар кэмигэр олоҕу сырдатар саҥа идиэйэлэр киириэхтэрэ, кыах арыллыа. Уларыйарга бэлэм буолуҥ.
Эһиил Моҕой Хотун ордук хойдору хатаҕалыыр санаалаах. Кини хой майгытын-сигилитин, кыаҕын аһара бэркэ билэр. Балыктары эмиэ умнуо суоҕа. Икки-үс баҕа санааларын толорор былааннаах. Оттон игирэлэр үлэлэрэ-хамнастара тупсуо, үп-харчы кэлиэ.
Уопсайынан, Моҕой Хотун зодиак бэлиэлэригэр тугу түстүүрүй?
Хой
Туох эмэ бырайыакка, идиэйэҕэ куттаммакка ылсыахха сөп. Ол үлэҕэ-хамнаска, тус олоххо – барытыгар сыһыаннаах. Сынньана, күннээҕи түбүктэн аралдьыйа таарыйа урут букатын билбэтэх, дьарыктамматах дьыалаҕытыгар ылсыбыккыт барыстаахтык эргийэр чинчилээх. Ол гынан баран, быһымах майгылаах хойдор тиэтэллээх быһаарыныыттан ночоотуруохтара. Онон, толкуйдуур, ырытар-ырыҥалыыр ордук.
Оҕус
Оҕус өсөһүнэн биллэр эрээри, Дьылҕа Хаан кинитээҕэр өһөс. Ол да иһин бу сыл элбэх соһуччу түгэннээх буолуо. Урут түһэн эттэххэ, үтүөтэ мөкүтүн лаппа баһыйар. Сайын ортотугар ыра, баҕа санааҕыт туолуоҕа. Онтон кынаттанан үлэҕэ да, олоххо да табыллыаххыт. Күһүн доруобуйа доҕолоҥноон ылыан сөп эрээри, эрдэттэн көрүнэ сырыттахха, этэҥҥэ ааһыа.
Игирэлэр
Бу сылы Үүнүү, Сайдыы уонна Ситиһии диэн тыллар арыаллыыллар. Сыл бастакы аҥаарыгар аһара өр толкуйдуур, ырытар-анаарар бириэмэ суох буолуоҕа, быһаарыыны түргэнник ылына охсуохха наада. Онтон хамнас, соло-дуоһунас үрдүүрэ быһаччы тутулуктаах. Күһүөрү кыһын харчылаах, сүүйсүүлээх оонньуулартан туттуммут ордук.
Араак
2025 сыл барыта даҕаны тыҥааһыннаахтык ааһар чинчилээх. Ол гынан баран, онтон аһара долгуйар, куттанан ыһыктынан кэбиһэр наадата суох. Ол тыҥааһын, түһүү-тахсыы түмүгэр иэс-күүс кыаһытыттан босхолонуоххут, дьоннуун сыһыаҥҥыт тупсуоҕа, үлэҕитин-хамнаскытын да уларытыаххыт эбэтэр үүнүөххүт-үрдүөххүт. Уопсайынан, бу сыл тургутуу уонна олох тупсуутун сыла.
Хахай
Үүнүү-сайдыы уонна бэйэ ис кыаҕын арыйыы сыла. Сыалы-соругу ситиһэр туһугар, бары кыаҕы туһана сатааҥ. Тугу эмэ ситистигит да, кыратык бэлиэтиири, бэйэни хатаҕаланары умнумаҥ. Кулун тутартан саҕалаан өй-санаа сааһыланан, олоҕу көрүү уларыйан барар чинчилээх. Ол дьоҕус тургутууну эттэҥҥэ аастахха, аны 10–15 сыл туохха да долгуйумуохха сөп. Доҕотторгутун умнумаҥ.
Кыыс
Хас эмэ ыйдаах, сыллаах сыралаах үлэ кэннэ ол үтүө түмүгүнэн үөрэ-көтө, дьоһуннаахтык туһанар кэм кэлбит. Наҕараада, хайҕабыл, бириэмийэ – барыта эһиэхэ эрэ. Уопсайынан, үлэ-хамнас чааһыгар сулустар ситиһиини эрэ түстүүллэр. Арай эр-ойох уонна дьоннуун сыһыан доҕолоҥнуох курдук. Ону тулуурдаах буолуу уонна аһаҕастык кэпсэтии эрэ быыһыахтара.
Ыйааһын
Сыл бастакы аҥаара киһи сымыйанан эппитин курдук холкутук, нуһараҥнык ааһыа. Онон ити кэми туһанан, үлэҕэ-хамнаска, тус олоххо туттумахтаан хаалыахха сөп. Алтынньыттан холку олох умнуллан, үлэҕэ умса түһүөххүт. Киҥир-хаҥыр саҥарар, ордугургуур да дьон бааллар. Кинилэр үктэтиилэригэр киирэн биэрбэт туһугар, сэрэхтээх буолуҥ, докумуону аахпакка эрэ илии баттаамаҥ. Будулҕаннаах сыл иккис аҥаарын “сырдык кыыма” – үп-харчы эбиллиитэ киэргэтиэ.
Скорпион
Быйыл хамаанданан үлэлиир үтүө өрүттэрин билиэххит. Ситиһии да кэлбэхтии сатыаҕа, харчы да халыҥыаҕа. Ол гынан баран, ордук харчыланнахха быстахха туттубатах ордук. Күһүөрү сайын элбэх харчы наада буолан туруоҕа. Сулумах дьон ити кэмҥэ билсибит киһилэрин киэр аспаттара, киниэхэ эрэммиттэрэ үтүө түмүктээх буолуо, доҕордуу сыһыан тапталга кубулуйуон сөп.
Охчут
2025 сыл – сэрэнии-сэрбэнии сыла. “Барытын кыайабын-сатыыбын, билэбин” диэн киһиргиир, дьонтон ордук буолан көстө сатыыр туох да үчүгэйгэ тиэрдиэ суоҕа. Тылы-өһү, дьоҥҥо сыһыаны көрүнэр кэм эмиэ кэлбит. Былырыын күһүҥҥүттэн олоххо киллэрэ сатыыр былааҥҥыт сааһыары табыллан барыа эрээри, үп-харчы кыһарыйыа. Онон, алтынньыга–сэтинньигэ диэри харчыта мунньуҥ, кыраҕа-бытархайга бараамаҥ. Ситиһии кэлэр ыйдара – сэтинньи уонна ахсынньы.
Чубуку
Быйыл үөрэммит, халыып буолбут олоххут тэтимиттэн тахсыаххытын, босхолонуоххутун, туох эрэ саҥаны тобулан, халбархай да суоллары тургутан көрүөххүтүн сөп. Сулустар “барыта табыллыахтаах” диэн сылыктыыллар. Сааһыары сайын үлэҕэ-хамнаска ыгыахтара, отчуотунан-үлэнэн көмүөхтэрэ эрээри, өһөспөтөххүтүнэ, үүнэр-үрдүүр суол арыллыа. Тус олоххут – уу нуһараҥ, холку.
Күрүлгэн
Бу сыл саамай улахан тургутуута – дьону кытта сыһыан. Быйыл кимнээх эһиэхэ үтүө өрүттээхтик дьайалларын, кимнээх күүһү-күдэҕи өһүлэллэрин быһаарыаххыт. Ол тапталга, дьиэ кэргэн иһинээҕи, кэллиэгэлэрдиин сыһыаҥҥа – барытыгар биллиэҕэ. Сайын урбаан дьыалатын саҕалыырга, үптээх-харчылаах бырайыакка кыттыһарга быһаарыылаах түгэн үүнүө. Өр толкуйдуоххут – барытын куоттарыаххыт.
Балыктар
Кыһын уонна саас биир күдьүс бүппэт, салгымтыалаах үлэттэн сылайан туох эрэ саҥаны көрдүөххүт. Быыһанар суол биир – айар-тутар эбии дьарык. Күһүн ону сатаан туһаннаххытына, үбүнэн-харчынан эргитэн таһаарыаххытын сөп.
Алтынньыга–сэтинньигэ “кини эбит” дэтэр таптал уота күөдьүйүө. Ол гынан баран, уһулуччу киһи суоҕун умнумаҥ, кыра, бытархай суолу бырастыы гынарга үөрэниҥ.
