Өрөспүүбүлүкэ олохтоохторо хатыыһы илимнээн сууттаммыттарын, сороҕор хаайыллыбыттарын уонна хас эмэ мөлүйүөн солкуобайга ыстарааптаммыттарын туһунан субу-субу истэр курдукпут. Оттон аҕыйах хонуктааҕыта социальнай ситимҥэ Ил Дархан Айсен Николаев илим көрө сылдьар, онтугар хатыыс иҥнибитин үөрэ-көтө араара турар биидьийэтэ тарҕаммыта. Билбэт дьон, биллэн турар, “салайааччыларбыт бэйэлэринэн сокуону кэһэллэр” диэн бэркиһээбиттэрэ.
Оннук буолбатах. Хатыыһы балыктыыр – көҥүллэнэр. Ол гынан баран...
РФ Балыктааһын туһунан быраабылатыгар сурулларынан, бэйэ сииригэр аҕыйах хатыыһы (сибирский осетр) сокуон хараҕар эппиэттиир булт тэрилинэн, анал көҥүллээх сиргэ балыктыыр көҥүллэнэр. Онно туох да хааччах суох, омнуоламмат. 2024 сыл түмүгүнэн, Саха сиригэр Өлүөнэ өрүс сүнньүгэр хатыыһы балыктыахха сөптөөх 26 анал учаастак баар.
Үөһэ этиллибитин курдук, хатыыһы балыктыыр туспа ирдэбиллээх. Ол барыта путевкаҕа суруллар. Холобур, 30 миэтэрэттэн кылгас усталаах илиминэн, 50 миэтэрэттэн кылгас лескалаах, 3-тэн аҕыйах күрүчүөктээх “закидушканан” балыктыыр көҥүллэнэр. Барыта 5 закидушка, 10-тан аҕыйах күрүчүөк буолуохтаах. Онтон атын тэрил – бобуулаах.
Аны туран, 62 сантымыатыртан улахан балыгы эрэ тутуохтааххын. Кыраны туттуҥ – ыстараап. Биир хатыыһы көҥүлэ суох тутан судаарыстыбаҕа хоромньуну таһаардаххына, 160 456 солк ыстарааптанаҕын.
Путевка сыанатын Главрыбвод Саха сиринээҕи салаата быһаарар. Ол курдук, 2024 сыллаахха 3 хатыыһы тутарга 1300 солк. төлүөххэ сөп этэ. Путевка 10 күннээх буолар.
Даҕатан эттэххэ, уопсайынан, балык көҥүлүн Главрыбвод Саха сиринээҕи салаатын (саайта – якутрв.рф) улуустааҕы бырабылыанньаларыттан, ол иһигэр Дьокуускайтан, Хаҥаластан, Мэҥэ Хаҥаластан, Уус Алдантан, Өлүөхүмэттэн, Үөһээ Бүлүүттэн, Ньурбаттан, Намтан, Бүлүүттэн, Кэбээйиттэн, Тааттаттан, итиэннэ биирдиилээн дьонтон, урбаанньыттартан, атыылаһыахха сөп.
Онон, Ил Дархан курдук үрдүк сололоох, мэлдьи дьон болҕомтотугар сылдьар киһи 1300 солкуобайы кэрэйэн уоран балыктаабыта, ону биидьийэҕэ устубута тарҕаммыта буолуо диэччилэр – улаханнык алҕаһыыллар. Хатыыһы бултуур – көҥүллэнэр. Ол гынан баран, путевкалаах эрэ.