Олунньу 21 – 28 күннэригэр, Москуба куорат Сибиир норуоттарын аһылыгын астыырынан биллэр “MANUL” эрэстэрээнэ биһиги төрүт аһылыкпытыгар аналлаах “Саха сирин сэттиэлэтин” тэрийиэҕэ. Бу кэмҥэ Виктор Шайдецкий диэн асчыт Москуба олохтоохторун уонна ыалдьыттарын «саха төрүт аһынан», холобур: тоҥ балыктан, хаантан, убаһа этиттэн талба бүлүүдэни астаан күндүлүөҕэ. Кини саха төрүт аһын туһунан маннык кэпсиир:
- Саха сирин гастрономическай эрэгийиэн диир олус уустук. Онно барыта төһө кыалларынан харыстанан, судургутук уонна түргэнник астанар. Барытын буһаран, аһытан эбэтэр сиикэйдии, тоҥнуу сиэниллэр. Холобур, балыгы тутан баран тута тоҥороллор, онтон ыраастаан баран кыһан сииллэр. Чэ, кыратык туустаан, биэрэстээн сиэхтэрин сөп. Сайын сир астыыллар, кыстыкка бэлэмнэнэн араас барыанньаны оҥороллор. Онтон кыһын устата эт сиэри элбэхтик бултууллар, муус аннынан балыктыыллар. Кинилэр элбэх үүт бородууксуйалаахтар, онон биһиги менюбутугар үрүҥ ас эмиэ киириэҕэ. Сахалар сүөһүттэн тугу да хаалларбаттар, барытын тутталлар. Оннооҕор буотарах мииннээхтэр. Ону олус сөбүлүүллэр уонна хайаан да астыыллар. Биһиэхэ эмиэ баар буолуоҕа, ол эрээри туспа интэриэһинэй, гастрономическай истииллээх. Саха төрүт аһа көннөрү аһыыр туһугар эрэ астаммат, тыйыс усулуобуйаҕа сөп түбэһэр, тыыннаах хаалар туһугар астанар, - диэн асчыт билбэт дьоҥҥо быһаарар.
Оттон мин санаабар, биһиги аспыт төһө да судургутук астанарын иһин, Москуба этэ, үүтэ чыҥха атын буоллаҕа эбээт. Ол эбэтэр, Саха сиригэр астанар төрүт аспытыттан букатын атын ас тахсыа буоллаҕа. Чэ, хайдаҕын да иһин, олус интэриэһинэй тэрээһин, онон төһө сатыылларынан тэрийэн ыыттыннар.
Олеся ТИМОФЕЕВА
