Аан дойду дьахталларын күнүн көрсө, үгэскэ кубулуйбут “Чэйиҥ эрэ, кыргыттар!” күрэх Дьокуускайга Очиченко уулуссаҕа турар 2-с №-дээх поселение-холуонньаҕа буруйдарын боруостуур дьахталлар ортолоругар ыытылынна.
Үгэс курдук, күрэх 5 түһүмэҕинэ барда: “Бэйэни билиһиннэрии”, “Дойду” (РФ субъектарын билиһиннэрии), “Айар күрэх”, “Муоданы көрдөрүү”, “Хаһаайка”. Бу туһунан УФСИН Саха сиринээҕи управлениетын пресс-сулууспата иһитиннэрэр.
Күрэх эрэгийиэннээҕи түһүмэҕин кыайыылааҕа – Л. бэйэни билиһиннэриитэ Москубаҕа Арассыыйа Буруйу толуйтарыыга федеральнай сулууспатыгар (УФСИН) ыытыллыбыт. Манна уопсайа ФСИН 71 территориальнай уорганнарыттан сайаапкалар киирбиттэр.
Саха сириттэн буруйун боруостуур Л. Арассыыйа хаайыыга олорор дьахталларын ортотугар ыытыллар “Чэйиҥ эрэ, кыргыттар!” күрэххэ 3-с бочуоттаах миэстэни ылла! Кини холуонньа остолобуойугар үлэлиир. Л. иистэнэр, уруһуйдуур, үҥкүүлүүр уонна ас астыыр дьоҕура бу күрэххэ чаҕылхайдык кыттарыгар көмөлөспүт.
Күрэххэ кыттыбыт Л. дьүүл сүбэтин иннигэр этиититтэн:
– Үтүө күнүнэн, доҕоттор! Хотугу кыраайтын итии-истиҥ эҕэрдэтэ тутуҥ! Мин аатым Л., кырылас кумахтаах Бүлүү куоратыгар төрөөбүтүм. Оҕо эрдэхпиттэн төгүрүк тулаайах хаалан, эһэбэр иитиллибитим, кини миигин төрөппүт оҕотун курдук тапталынан угуттаан улаатыннарбыта. Кини миэхэ тыйыс тымныылаах, кэрэ айылҕабытын көрдөрбүтэ, сыаналыырга, таптыырга үөрэппитэ. Иллэҥ кэммэр, дьахтар сиэринэн кэрэни айарга дьулуһабын – иистэнэбин, уруһуйдуубун уонна үҥүүлүүбүн. Маны таһынан, дьиэтээҕи минньигэс аһы астаан күндүлүүрбүн сөбүлүүбүн.
Маннык тэрээһиннэр хаайыыга олорор дьахталлар дойду төрүт үгэстэригэр сысталларыгар, култуураҕа кыттыгастаахтарын өйдөтөргө көмөлөөхтөр, маны таһынан, кинилэр олоххо көхтөөх буолалларыгар уонна хаайыы кэннэ оннуларын булалларыгар төһүү буолар.
Сонун төрдө: УФСИН Саха сиринээҕи управлениета
