Кэрэ аҥаардар күннэрин көрсө аан маҥнайгытын ыытыллар «Аар Кудай» кэрэ көстүү уонна духуобунас күрэҕэр финалга киирбит 46 кэрэ аҥаар «Арчы» дьиэтигэр тоҕуоруһа муһуннулар. Кыттааччылар Сахабыт сирин араас улуустарыттан, Дьокуускай куораттан ону таһынан уруулуу Кыргызстан, Бурятия өрөспүүбүлүкэлэриттэн кэлбиттэр, Соҕуруу Африка Намибия, Ботсвана дойдуларын бэрэстэбиитэллэрэ кытары бааллар.
Күрэх түмүгүнэн саастарынан арахсан «ААР КУО» (17–30 саастарыгар диэри), «ААР ХОТУН» (31–41), уонна «ААР ДАЛБАР» (42 саастан үөһэ) диэн анал ааттары ылыахтара. Муҥутуур кыайыылаах «ААР КУДАЙ» үрдүк аатын сүгүөҕэ.
Күрэх маҥнайгы күнүгэр кыргыттар, сахалыы үрүҥ халадаайдаах кыталыктыы кынталдьыһан киирэн, саха сиэринэн алгыстаннылар. Алгыһы Саха сирин үтүөлээх артыыһа РФ култууратын үтүөлээх үлэһитэ Афанасий Фёдоров иилээн-саҕалаан ыытта. Успуорка ситиһиилээх эр бэртэрэ сибэкки дьөрбөтүн бэлэхтээтилэр. Салгыы кыргыттар хаһыс нүөмэринэн кытталларын долгуйа таллылар. Бу нүөмэринэн кулун тутар 16 күнүгэр Суорун Омоллоон аатынан Опера уонна Балет судаарыстыбаннай тыйаатырыгар гранд-финалга кыттыахтара. Муҥутуур кыайыылаах Индияҕа ыытыллар Норуоттар икки ардыларынааҕы «MRS.UNITY 2025» кэрэ куолар күрэхтэригэр путёвканы уонна харчынан 1 мөлүйүөн бириис тутуоҕа! «Аар Кудай» кэрэ куоларын 8 күн устата араас көрсүһүү, маастар-кылаас, духуобунас практиката, cайдыы, бэйэ-бэйэни кытта билсии, кэрэ эйгэлиин алтыһыы кэтэһэр.
Зарьяна Юмшанова – «Аар Кудай» бырайыак ааптара, иэйиитэ, салайааччыта, инбиэстэрэ, «ААР КУДАЙ» духуобунай пуонда төрүттээччитэ, Индияҕа ыытыллыбыт «MRS.UNITY WORLD», Арассыыйаҕа «MRS RUSSIAN WORLD» Кэрэ куолар күрэхтэрин муҥутуур кыайыылааҕа, «MRS.UNITY WORLD» Аан дойдутааҕы кэрэ күрэҕин бэрэсидьиэнэ, духуобунай сирдээччи (проводник).
«ААР КУДАЙ» кэрэ көстүү уонна сиэрдээх майгы күрэҕэр кыттааччы бигэ туруктанарыгар, бэйэҕэ эрэллээх буоларыгар, дууһатын сайыннарарыгар, алмаас таастыы чочулларыгар, аан дойду аана хас биирдии киһиэхэ аһаҕас диэн санааҕа салайтарарыгар сүрүн болҕомтобутун уурабыт. Мантан сиэттэрэн сахабыт төрүт култууратын, итэҕэлин, сиэрин-туомун аан дойду таһымыгар таһаарар, дьоҥҥо-сэргэҕэ биллэрэр сыаллаахпыт. Аар Кудай диэн тыл Үөһэттэн ананан дьиктитик кэлбитэ. Аар Кудай – киэҥ куйаар таптала. Аар – киэҥ куйаар, Кудай – диэн уус. Ол иһин хас биирдии дьахтар бэйэтэ туспа уратылаах, киэҥ куйаардыын ыкса ситимнээх!
Күрэх саҕаламмытын нөҥүө күнүгэр «Аар Кудай» кэрэ куолара халыҥ хамаанданан «Нараада» парк-отельгэ айаннаатылар. Кыттааччылар сыанаҕа, дьон ортотугар хайдах бэйэлэрин кылгас кэм иһигэр чаҕылхайдык билиһиннэрэллэригэр продюсер, бренд-менеджер, режиссёр Аполлинария Дегтярёва араатар ускуустубаҕа маастар-кылаас ыытта.
Салгыы «Аар Кудай» бырайыак салайааччыта, «МRS UNITY WORLD» аан дойдутааҕы кэрэ көстүү күрэҕин бэрэсидьиэнэ, настаабынньык Зарьяна Юмшанова «ENERGY ACCES FACELIFT» диэн Норуоттар икки ардыларынааҕы «кэрэ эйгэ уонна уйгулаах олох» кууруһун тэрийдэ. Бу быраактыка кэрэ аҥаар бэйэтин этин-хаанын истэригэр,тууйуллубут санааттан босхолоноругар дьикти күүстээх эбит. Ол курдук, быраактыка кэмигэр сорох кыыс утуйан, сорох тууйуллубут санаата симэлийэн, уоҕуран, киһилии саҥаран киирэн барда; ураты чараас эйгэ олохтонно, өбүгэ ситимэ күүстээҕин өссө төгүл дакаастаата.
«Аар Кудай» күрэҕин 3-с күнэ сиэри-туому үөрэтииттэн саҕаланна.
СӨ үтүөлээх артыыһа, РФ култууратын үтүөлээх үлэһитэ Афанасий Фёдоров-Охонооһой кыттааччыларга Саха кэрэ куота хайдах тутта-хапта сылдьыахтааҕын, өбүгэ төрүт үгэстэрин кэпсээтэ. Кыргыттар үксүлэрэ ыал мааны ийэлэрэ, онон оҕону сахалыы иитиини, дьиэ кэргэҥҥэ ийэ, аҕа оруолун туһунан долгуйар ыйытыктарын ыйыттылар, санааларын, көрүүлэрин эттилэр. Маны сэргэ бу күн Саха сирин көмүс куолаһа, СӨ үтүөлээх артыыһа, араатар ускуустубатын педагога, дииктэр Сардаана Николаевна Фёдорова маастар-кылаас ыытта. Кыргыттар тылы, дорҕоонноохтук этэргэ үөрэннилэр, саҥарар саҥаны сайыннарар сатабыллары баһылаатылар.
«Аар Кудай» кэрэ куолара оҕо саас бырааһынньыгын бэлэхтээтилэр!
4-с күн эти-хааны эрчийэр сэргэх сэрээккэттэн, фитнестэн саҕаланна. Сэрээккэни Саха сиринээҕи Фитнес федерациятын бэрэсидьиэнэ Лилия Дмитриева ыытта. Салгыы күрэх спикерэ Аполлинария Дегтярёва тус бренди хайдах сайыннарар туһунан сиһилии кэпсээтэ, саҥа дьону кытта хайдах толлубакка билсэргэ үөрэттэ. Ол кэннэ «Сделай брови» солуон салайааччы кыргыттара: визажист – Дайаана Баланова, баттах стилиһэ Саргылаана Васильева кэрэ буолуу кистэлэҥнэрин арыйдылар.
Бу күн умнуллубат түгэнэ «Аар Кудай» кэрэ куолара Дьокуускай куорат дьиэ кэргэннэрэ оҕо дьиэтиттэн иитэ ылбыт оҕолоругар анаан аһымал тэрээһини тэрийбиттэрэ буолла. Кыттааччылар хас да бөлөххө арахсан оҕолору оонньоттулар, маастар-кылаас ыыттылар, астатан, уруһуйдатан, чугастык алтыһан, минньигэс бэлэх туттаран оҕолор үөрүүлэрэ үс бүк үрдээтэ.
Мантан ыла кулун тутар 16 күнүгэр буолар «Аар Кудай» гранд-финалыгар кыттар кыргыттар Сардаана Порядина салайааччылаах «PRO MODELS» модель ааҕыныстыбатыгар сыанаҕа хаамалларын дьарыктаныахтара.Бэлиэтээн эттэххэ, 46 кыттааччы бэйэни билиһиннэриитин уонна талаанын көрдөрөр нүөмэрин дьүүллүүр сүбэ кулун тутар 13 күнүгэр анаан-минээн көрүөҕэ. Онно биһирэммит нүөмэрдэр кулун тутар 16 күнүгэр буолар «Аар Кудай» гранд-финалыгар киириэхтэрэ.
Аан маҥнай ыытыллар Норуоттар икки ардыларынааҕы кэрэ көстүү уонна сиэрдээх майгы күрэҕин бэлиэ түгэнин көтүтүмэҥ! Ким «Аар Кудай» үрдүк аатын сүгэр?
«Аар Кудай» тэрээһин пресс-сулууспата, Уйгулаана ПОРТНЯГИНА.
