«Аар Кудай» Норуоттар икки ардыларынааҕы кэрэ көстүү уонна сиэрдээх майгы куонкуруһа кыайыылаахтарын быһаарда!
Санатан эттэххэ, кулун тутар 8 күнүттэн 45 кыыс куо, далбар хотун 8 күн устата маастар-кылаастарга үөрэннилэр, саҥарарга-иҥэрэргэ, сиэри-туому тутуһарга, өбүгэ үтүө үгэстэригэр, ураты бүлүүдэлэри астыырга уо.д.а. кэрэ аҥаар сатабылларыгар. Гранд-финалга кыргыттар «Аар Кудай» официальнай партнёрдарын таҥастарын, киэргэллэрин-симэхтэрин кэтэн долгулдьуһа хаамтылар.
Зарьяна Юмшанова - Аар Кудай» бырайыак ааптара, иэйиитэ, салайааччыта, инбиэстэрэ, «ААР КУДАЙ» духуобунай пуонда төрүттээччитэ, Индияҕа ыытыллыбыт «MRS.UNITY WORLD», Арассыыйаҕа «MRS RUSSIAN WORLD» Кэрэ куолар күрэхтэрин муҥутуур кыайыылааҕа, «MRS.UNITY WORLD» Аан дойдутааҕы кэрэ күрэҕин бэрэсидьиэнэ, духуобунай сирдээччи (проводник).
- Бастакы сырыыга үрдүк таһымҥа ааста. Хаһан баҕарар бастаан ыытыллар тэрээһин туспа ымпыктаах-чымпыктаах буолар. Тэрээһини ыытааччы быһыытынан аныгыскы сырыыга өссө үчүгэйдик оҥорор былааннахпыт.Уопсай куоластааһынынан дьүүллүүр сүбэни таллыбыт. Анал ааттары ылбыт кыргыттар бу көстүүгэ эрэ буолбакка, куонкурус саҕаланыаҕыттан бэйэлэрин бары өттүнэн көрдөрдүлэр. Биһиги күрэхпит сүрүн сыала-соруга -- үөрэтии бырагыраамата, ол эбэтэр кыттааччы уларыйыытыгар, сыанаҕа тахсан эрэллээхтик туттарыгар-хаптарыгар күүһү ууруу.“Аар Кудай” – истиҥ санаалаах, аһаҕас, амарах ийэ, дьоҥҥо сэргэҕэ ийэлии сыһыаннаах, холобур буолар далбар хотун.
Василиса Яковлева Үөһээ Бүлүүттэн төрүттээх, Дьокуускайга олорор:
- Аар Кудайга кэлбиппиттэн наһаа үөрэбин. Хаһан да сылдьыбатах, сылдьыахпын баҕарар сирдэрбэр сырыттым, астык кыргыттары кытта билистим. Харахтара уоттаах, бары биир энэргиэтикэлээхпит, биир интэриэстээхпит! Кыргыттар сибээспитин тута сылдьыахпыт. «Аар Кудайга» кыттыбыт кыргыттар ылбыт билиибитин атын кыргыттарга тириэрдиэхпит, сүбэ-ама буолуохпут диэн эрэннэрэбин.
«Аар Хотун» (30 саастарыттан 41-гэр диэри):
Юлия Симонова (Мииринэй):
- Ис-испиттэн баҕаран туран кытынным, мээнэ буолбатах. Кэрэ куоларга, далбар хотуттарга сүбэм: хаһан да толлубака, туохтан да куттаммакка, өйүүр дьон баарын тухары киирсэн, кыттан иһиҥ. Барыта табыллыа! Чуолаан бу күн күүскэ өйөөбүт Марфа, Василена Шариналарга махталбын тириэрдэбин.
«Аар Далбар»
Зульфия Слепцова, Сунтаартан төрүттээх, Дьокуускайга олорор:
- Маннык хабааннаах күрэхтэргэ оҕо эрдэхпиттэн кыттыахпын баҕарарым. Куонкурус кэрэ көстүүнү эрэ буолбакка ис туругу өрө тутара астык! Духовность диэн дьону таптыырга, көмөлөһөргө үөрэтэр. Мин «Аар Далбар» аатын ылан улаханнык соһуйдум уонна үөрдүм! Оҕо сааһым баҕа санаата туолбутуттан дьоллоохпун! Түгэнинэн туһанан, сүрүн тэрийээччибитигэр, «Аар Кудай» иэйиитигэр, бырайыак ааптарыгар Зарьяна Юмшановаҕа махтанабын!
«Аар Кудай»
Сардаана Гуляева, Уус Алдан:
- Кыргыттары кытта сиэттиһэн, бииргэ муҥутуур финалга кэлбиппититтэн, доҕордоһуу кэрэ эйгэтэ олохтоммутуттан олус үөрэбин, наһаа үчүгэй! Бу түмүк буолбатах, бу -- саҥа саҕаланыы! Наһаа долгуйдум, уйадыйдым! Төрөппүттэрим, бииргэ төрөөбүттэрим, дьүөгэлэрим, кэллиэгэлэрим кэлэн күүстээх өйөбүл буоллулар. Чугас дьонум өйөбүллэрэ кынаттаата!
"Аар Кудай" үрдүк ааты сүкпүт Сардаана Гуляеваҕа Индияҕа «MRS UNITY WORLD» күрэххэ дойдутун чиэһин көмүскүүрүгэр путёвка уонна 1 мөлүйүөннээх сертификаты туттардылар!
