Саха хоһуун дьонун суолдьут сурунаалын "Байдам" саҥа 3-с нүөмэригэр Улуу Кыайыы 80 сылынан сахаттан бастакы идэтийбит баталист худуоһунньук Иван Лебедев кыайыы үөрүүтэ, саллаат суола, норуот олоҕо үйэтитиллибит хартыыналарын, айар үлэтин кытта билсиэххит.
Горнай Маҕараһыттан туостан тигии маастара, анал байыаннай дьайыыга олоҕун толук уурбут буойун ийэтэ Анна Степанова тыа сирин олохтооҕун күҥҥэ бүппэт түбүгүн, айар үлэтин туһунан кэпсиир.
Ыһыах кэлбитинэн, кэрэ аҥаардарга саха таҥаһын бэйэлэрин креативнай көрүүлэрин киллэрэн, уустаан-ураннаан тигэр эдэр иистэнньэҥнэри билиһиннэрэбит.
Саха сирин кылгас сайынын сиэдэрэй кэрэтин үйэтитэр оҥоһуктары оҥорор дьарыктаах Софроновтар дьиэ кэргэттэрин холобура үгүс тыа сирин ыалыгар суолдьут сулус буолуоҕа.
ХИФУ иһинэн эмтээх оттору туһанан, тирии кириэмнэрин, сүһүөх ыарыытыттан харыстыыр маастары оҥорор буолбуттарын сэргиэххит.
Абыйга Антонина Горохова арбуз, эриэппэ луук, чусунуок, атын да оҕуруот аһын элбэҕи үүннэрэр. Бу уопут тэнийдэҕинэ, хоту сир дьоно чахчы чэпчэки, элбэх битэмииннээх аһынан хааччынар буолуохтара.
Туйаара Уваровская тарбаҕар таҥараттан анаммыт талаанынан дьиэтин иһин малын-салын, миэбэлин харах халтарыйар кэрэ оҥорор маастар. Дьиэ иһин киэргэтиигэ айылҕабыт матырыйаалларын сатаан туттарга үөрэниэҕиҥ.
Александр Винокуров оҕо талаанын, толкуйун сайыннарар сахалыы остуол оонньууларын айбытын туһунан аахпыт киһи, оскуолаларга, уһуйааннарга киэҥник тарҕанарыгар баҕарыа.
Эбээн омугун култууратын хараанньыта, дьоҥҥо инникилэрин кырыйан кэпсиир айылҕалаах, талааннаах иистэнньэҥ Туйаара Колесова өбүгэтиттэн бэлэхтэппит дьарыгын дьиктиргии ааҕыаххыт.
Сурунаалы “Горпечать” киоскаларыттан, Бэчээт дьиэтин 111 каб. атыылаһыаххытын сөп.Сурутуу сыаната сыл аҥаарыгар 997,11 солк., почтаҕа, эбэтэр 8-968-150-67-15 төл. сурутаҕыт. Билигин сыл иккис аҥаарыгар ыытыллар чэпчэтиилээх сурутууга тиэтэйиҥ.Эрэдээксийэ төл: 8-914-274-15-69
