Арассыыйаҕа 1250 тахса куорат баар. Итинтэн 31-рэ иккиттэн элбэх «амыдайдаахтар». Роскадастр дааннайынан, 67 куорат тэҥ ааттаах. Мантан сорохторо саҥа эрэгийиэннэргэ төрүттэммиттэр. Ол курдук, Саха сирин Мииринэйэ куорат статуһун 1959 с., оттон Архангельскай уобалас Мииринэйэ куорат статуһун 1966 с. ылбыттар.
Тэҥ ааттаах нэһилиэнньэлээх пууннар өссө элбэхтэр. Холобура, Мииринэйгэ баар Светлай бөһүөлэк «амыдайдара» Калининград уонна Саратов уобаластарыгар бааллар. Саха сирин Ленскэй куоратын «амыдайдара» Пермь уонна Красноярскай кыраайдарга (сэлиэнньэлэр) бааллар. Удачнай куорат «амыдайдара» Новосибирскай уонна Астраханскай уобаластарга бааллар.
Арассыыйаҕа ордук элбэхтик Покровскай диэн ааттаах сирдэр көстөллөр. Хаҥалас администартивнай кииниттэн ураты маннык ааттаах сэлиэнньэлэр Мордовияҕа, Калуга уобалаһыгар уонна Марий Элга бааллар. Тыл төрдүнэн көрөр буоллахха, Абый улууһун Белай Гора бөһүөлэгин «амыдайдара» Амур уобалаһыгар уонна Крымҥа (куораттар), Иркутскай уонна Кемеровскай уобаластарга (бөһүөлэктэр) бааллар.
Бэлэмнээтэ Андрей Шилов.
