“Проспект” ГК Дьокуускайга тутар “Ленские высоты” диэн кыбартаала Арассыыйаҕа тутуллар дьиэлэргэ ыытыллар “ТОП ЖК-2026” диэн улахан күрэххэ бастакы миэстэни ылла уонна “Саха сирин бастыҥ комплекса – тутулла турар дьиэтэ” буолла. Күрэх түмүктүүр түһүмэҕэ Москубаҕа Арассыыйатааҕы тутуу нэдиэлэтигэр ыытылынна. Тутуу министиэристибэтин өйөбүлүнэн “Единый ресурс застройщиков” портал тэрийдэ.
Быйыл бириэмийэҕэ 700 девелопер кытынна, 1,5 тыһ. тахса дьиэ киирдэ. Дьүүллүүр сүбэҕэ 200 аналитик, тутар хампаанньалартан эспиэрдэр кытыннылар. Федеральнай эспиэрдэргэ “ДОМ.РФ” куораты сайыннарыы дириэктэрэ Антон Финогенов, Арассыыйа Архитектордарын сойууһун бэрэсидьиэнэ Николай Шумаков, РФ Атыы-эргиэн, бырамыысыланнай палаататын тутуу хайысхатыгар урбаан дириэктэрэ Ефим Басын бааллар.
Кыайыылаахтары чиэстиир үөрүүлээх тэрээһин кулун тутар 5 күнүгэр буолла.
ТОП ЖК бириэмийэнэн наҕараадаланыы тутуллар комплекс үрдүк хаачыстыбалааҕын туоһулуур. Бастакы миэстэ иһин эрэгийиэн 10 комплекса күрэстэстэ. Дьиэ, кыбартыыра тэхиниичэскэй харахтарыыстыкатыттан саҕалаан чугаһынан төһө маҕаһыын, табыгастаах оҕо оонньуур былаһаакката, кэлээскэ туруорар сирэ, уһуйаан, оскуола баарыгар уо.д.а. тиийэ уопсайа 133 параметрынан сыаналаатылар.
“Ленские высоты” кыбартаал – Саха сиригэр тутулла турар улахан бырайыак. Бизнес уонна комфорт кылаастаах дьиэлэрдээх, биир кэлим архитектурнай кэнсиэпсийэлээх куорпустардаах. Бырайыакка ыйылларынан комплекс 33 га иэннээх сиргэ тутуллар. Дьон олороругар, сынньанарыгар табыгастаах усулуобуйалаах, массыыната суох тиэргэннэрдээх, ичигэс парковкалаах, 1 км уһуннаах кытыл устун хаамар сирдээх, олохтоохторго уонна ыалдьыттарга анаммыт уопсастыбаннай сирдэрдээх буолуоҕа.
Юрий Владимирович Моисеенко (“Дьокуускай” өрүс пуордун СЗ ХЭУо, “Проспект” ГК генеральнай дириэктэрэ):
– 1 миэстэ дьон олороругар табыгастаах уонна куттала суох кыбартаалы тутарга дьулуһарбытын үрдүктүк сыаналыыр уонна бигэргэтэр. “Ленские высоты” кыбартаал – Саха сирин бастыҥ бырайыага. Бу иннинэ итинник диэн көннөрү саныыр эрэ эбит буоллахпытына, билигин доргуччу этэр кыахтанныбыт. Тутулуга суох улахан таһымнаах күрэххэ кыайыыбыт комплексы тутар ньымабытын олохтоохтор да, идэтийбит холбоһук (сообщество) да ылынарын көрдөрөр уонна, чахчы, бастыҥ тутуу буоларын бигэргэтэр.
Биһиги маннык үрдүк сыанабылы ылбыппытын киэн туттабыт уонна ситиһиибит манан түмүктэниэҕэ суоҕа диэн эрэннэрэбит.
