Аммаҕа урут бу эҥээр хаһан да харахтаабатах дьикти көтөрдөрө кэлбит – Даурия галката. Ол туһунан СӨ экологияҕа министиэристибэтэ иһитиннэрэр.
Амма олохтооҕо Николай Кривошапкин дьикти көтөрү ааспыт нэдиэлэҕэ Кэрэхтээх кыбаарталыгар түбэһэ түһэн хаартыскаҕа түһэрбит. Галка олохтоох тураахтары кытта булкуһа сылдьара эбитэ үһү. Хаартысканы биология институтугар ыытааттарын кытта, көтөр Даурия галката буоларын орнитологтар туох да саарбаҕа суох тута бигэргэппиттэр.
Учуонайдар этэллэринэн, Даурия галката Саха сиригэр урут охсуллан ааспыт түгэннэрэ бааллар эмиэ эбит. Ол курдук, 1956 с. ыам ыйын 4 күнүгэр итинник көтөрдөрү Өлүөхүмэҕэ, 1978 с. – Сунтаар Элгээйитигэр, 2007 уонна 2015 сс. Сунтаарга бэйэтигэр, 2016 с. – Майда өрүс төрдүгэр көрбүттэрэ бэлиэтээммит. Ол гынан баран, галка Аммаҕа бу бастакы ыалдьыттааһына.
Даурия галката Илин Сибииргэ, Забайкальеҕа, Уһук Илин кэккэ эрэгийиэннэригэр, ону тэҥэ Кытайга, Кэриэйэҕэ уонна Монголияҕа үөскүүр көтөр.
