Маннык кэрэ дойдуттан, ыраас салгынынан, быйаҥнаах хочо чэлгиэнинэн илгийэр дьоро киэһэни биир дойдулаахтарбыт куораппыт биир уораҕайыгар – А.Е. Кулаковскай аатынан Норуоттар доҕордоһууларын дьиэтигэр мустуу үөрүүтүн бэлэхтээтилэр.
Быйылгы сыл СӨ Култуура сыла биллэриллэн, дьон-сэргэ санаата кэлэн, өрө көтөҕүллэн араас хайысханан хамсааһыннарга көхтөөхтүк кытталлар.
Сахабыт сирин биир ытык кэрэ миэстэтигэр Амма эбэ үрдүгэр, Тэйэр хайа тэллэҕэр, үлэни өрө тутан, кэнчээри ыччаты тэнитэн, сыспай сиэллээҕи, адаар муостааҕы дэлэтэн, атырдьаҕы-кыраабылы, сүгэни-күрдьэҕи илииттэн араарбакка, тимир көлөнү баһылаан, сорсуннаах булчуттар олоҥхоһуттар-тойуксуттар, иистэнньэҥнэр, үөрэхтээхтэр олоҕу уһансыбыттара. Билигин кинилэр сыдьааннара айа-тута, билиини баһылыы, төрүт дьарыгы салҕаан олороллор.
Быйыл манна САССР үтүөлээх учуутала Петр Митрофанович Васильев аатынан оскуола арыллыбыта 100 сылын туолар. Ити бэлиэ даата Чурапчы улууһун дьаһалтатынан, үөрэх салалтатынан бигэргэтиллибит былаан чэрчитинэн, эбии үп киллэринэр сыаллаах улахан кэнсиэргэ Норуоттар доҕордоһууларын дьиэтин саалата көрөөччүнэн туолбута дойду ахтылҕанын, көмөлөһөр баҕа күүһүн туоһута буолла.
Урукку сылларга нэһилиэк сайдыытыгар олохторун анаабыт, бэйэлэрин кэмнэригэр эмиэ айан-тутан, ыллаан-туойан ааспыт инники көлүөнэ убайдарбыт, эдьиийдэрбит оҕолоро, аймахтара,сиэннэрэ бөлөҕүнэн сыанаҕа тахсан, көрөөччүлэри сэргэхситтилэр.
Тэрээһин куоракка баар бэтэрээн учууталларга сибэкки дьөрбөтүн туттарыыттан саҕаланна. Кэнсиэри Мырылаттан төрүттээх эдьиийдии-балыстыы Сайаана Попова уонна Настя Алексеева (Олоҥхо тыйаатырын артыыһа) хомус дьүрүскэнинэн уонна “Учууталга” ырыанан дьиэрэһиттилэр.
“Чурапчы күөрэгэйэ” Аграфена Кузьмина “Казахскай вальсын” олус табыллан, куолаһа чөллөрүйэн ыллаан, бэйэтин көлүөнэтигэр эдэр сааһы санатан, эдэрдэри күүстээх куолаһынан сөхтөрөн бастакы күүстээх ытыс тыаһын ылыан ылла. “Куолас кырдьыбат” диэн итини этэн эрдэхтэрэ.
Мырыла кулуубугар сэбиэдиссэйинэн үлэлээбит, оҕо сааспыт аргыһа, Прасковья Дмитриевна Романова кыыһа Елена Ильина Нам-ЧЫ, сиэннэрэ Сахая, Саргылаана ийэлэрин утумнаан истиҥ-иһирэх ырыаларын бэлэхтээтилэр. Оҕо эрдэхтэриттэн ырыаны аргыс оҥостубут игирэ кыргыттар Лира, Мира Макаровалар, убайдара – Мырылаҕа вокальнай- инструментальнай ансамбль салайааччыта, баянист, сыыдам сырыылаах таксист Николай Массаев эдэр саас тапталын хоһуйар ырыатынан ытыс тыаһын ыллылар.
“Төрөппүт дьонноро аттыларыгар баар кэмнэрин” ырыанан ахтан, видеонан ситэрэн аһардылар кэргэннии учууталлар Евдокия Афанасьевна, Николай Иванович Федоровтар оҕолоро Лилия Долгун, Афанасий.
Нэһилиэккэ бастакы музыкальнай үөрэхтээх ырыа учуутала, хоровик Анастасия Васильевна Собакина, сиэнэ Георгий Макар Хара тылыгар, Захар Винокуров мелодиятыгар “Юбилей ырыатын” дьиэрэттэ, уола Никита бэйэтин “Сомоҕо” бөлөҕүнэн квартеттаан эр дьон куоластарынан кэнсиэри ситэрдилэр.
Кэнсиэри Мэҥэттэн, Чурапчыттан төрүттээх Сергучевтар дьиэ кэргэннэрэ: ыал ийэтэ биир дойдулаахтарыгар биллэринэн, Татьяна Хомподоева, хатыламмат ураты куолаһынан “Күһүҥҥү күөрэгэйин” дьүрүлэттэ, аҕалара Георгийдыын триоларын кэнниттэн Уля Сергучева-Күннэй эҕэрдэ тылларын бэйэтин ырыатынан доҕуһуоллаан, ытыс тыаһын ньиргиттилэр.
Мария, Екатерина Дьячковскаялар кыргыттарыныын “Дойдум дьонун” ыллааннар, аҕалара, тойуксут Николай Дьячковскай утума салҕанарын өссө төгүл көрдөрдүлэр.
“Тускулаана”, оскуола үөрэнээччилэрин “Күрүлгэн”, эдэр учууталлар “Күлүм” бөлөхтөрө – туруорааччылар: Күннэй Николаева, Василий Брызгаев, нэһилиэккэ араас көлүөнэ үҥкүүһүттэрэ баалларын көрдөрдүлэр.
“Эргиллиэм эйиэхэ ахтар-саныыр Мырылам” диэн ис иһиттэн иэйэн-куойан туран бэйэтин ырыатын Леонид Собакин, убайдарыгар Любовь Щепеткина, Гаврил Эбиль (төрүттэрин сахалыы аатын ылыммыта) эмиэ итинник ис хоһоонноох ырыанан кыттыһаннар дойду ахтылҕанынан саалаҕа олорооччулары долгуттулар.
Ленинградка театральнай студия үөрэнээччитэ, блокада кыттыылааҕа Пелагея Борисова уола, айылҕаттан талааннаах баянист, ВИА салайааччыта Руслан Соловьев аата улууска умнуллубат. Бу күн кини балыстара Оксана, Полина, Альбина, Лена араас улуустан мустаннар, кэлэн убайдарын “Үрүҥ түүн хочонон хаамсарбыт үс туманы түһэрэн” ырыатынан эдэр саас сырдык тапталын көрөөччүлэргэ санаттаҕа...
Мырыла былыргыттан олоҥхоһуттарынан биллэр. Бу кэнсиэргэ Күндү Бытык Күндүөбэй сиэннэрэ Сергучева Татьяна, Күннэй, Долгун Лия, Афоня, Никита, Георгий, Сахая, Саргы куоластарынан кыттаннар утум салҕанарын көрдөрдүлэр.
Кыттааччылар сыанаҕа туттар-хаптар культуралара, таҥастара-саптара көрөөччүлэргэ убаастабылы бигэргэттэ.
Кэнсиэр Аграфена Кузьминанан саҕаламмыт буоллаҕына, консерватория үөрэхтээх вокалистка Мария Макарова толоруутунан түмүктэннэ.
Педагогичесай үлэ ветерана Мария Дьячковская тылыгар, Уля Сергучева-Күннэй мелодиятыгар Мырыла гимнинэн түмүктэннэ.
Маннык улахан, эппиэттээх тэрээһиҥҥэ куорат өттүттэн кэнсиэргэ көмө буоллулар: сахаҕа умнуллубат ырыалары хаалларан барбыт биир дойдулаахпыт Николай Сибиряков ырыаларын тарҕатааччы, үйэтитээччи Анастасия Готовцева, автор Петр Гуляевтыын “Маҥан хаар” ырыатынан эҕэрдэлээтилэр. Мырылаттан төрүттээх Саха Өрөспүүбүлүкэтин норуодунай худуоһунньуга А.Бочкарева-Иннокентьева эскизтэринэн “Сөргүтүү” айар түмсүү, Хатастан “Сэгэйэ” ырыа ансамбла (сал. Н.Теплоухова) “Амсат эрэ дьэдьэҥҥиттэн” толорон, “Дьөһөгөй үҥкүүтүнэн” тэрээһини өйөөтүлэр.
Кэнсиэр ситиһиилээхтик, уостубат ытыс тыаһынан барыыта тэрийээччилэртэн тутулуктаммыта саарбахтаммат. Тэрээһиҥҥэ кыттыстылар: Саха эстрадатыттан Т.Сергучева, А.Потапов; сценарийын иилээн-саҕалаан ыытта улуус киининээҕи “Айылгы” духуобунас кииниттэн Ольга Ноева, экраҥҥа көстүүнү таҥан оҥордо Андрей Илларионов, үҥкүүлэри туруордулар Күннэй Николаева, Василий Брызгаев.
Көрөөччүлэр лотореяҕа Күннэй Тимофеева мүөтүн, “Эргис” кооператив (сал. В.Петров) ынаҕын арыытын, “Сервис- Ойл” тэрилтэттэн (С.Тихонов) ГСМ-н сүүйэн астынан тарҕастылар.
Быыстапка-дьаарбаҥкаҕа ас атыылаан нэһилиэк администрациятын үлэһиттэрэ (эб. тол. Т.М. Николаева), оскуола коллектива эбии харчы киллэрдилэр. Киирии харчы уопсай сууматынан астыныы буолла диэн, оскуола коллектива кыттыбыт, тэрийсибит дьонноругар- сэргэлэригэр махталларын биллэрдилэр.
Маннык тэрээһиннэр кэлэр да өттүгэр биир дойдулаахтары түмэ турдуннар.
Варвара ПОПОВА.
