Бу күннэргэ “Авито Авто” эспиэрдэрэ Уһук Илиҥҥэ ханнык массыыналар саамай элбэхтик атыыланалларын, дьон ордук тугу сэҥээрэрин, атыылаһан баран атыылыырын ырыппыттар. Чинчийии түмүгэ көрдөрүнэн, Уһук Илин федеральнай уокурук саамай “популярнай” массыыната (40,3%), биллэн турар, “Тойота” буолбут. Иккис миэстэҕэ “Ниссан” тахсыбыт – 11,7%, үһүскэ – “Хонда” (9,2%), төрдүскэ – “Митсубиси” (4,8%), бэһискэ – “Лада” (4,5%).
Чопчу моделларынан араардахха, ордук элбэхтик дьон “Тойота Королланы” (3,7%) уонна “Тойота Марк 2-ны” (3,5%) сэҥээрэр эбит. Ону таһынан 10 “саамай” иһигэр “Тойота Ленд Крузер”, “Хонда Фит”, “Тойота Витц”, “Митсубиси Паджеро”, “Тойота Камри”, о.д.а. киирбиттэр. Кэккэ моделлары сыл иһигэр дьон быдан сэҥээрэр буолбут. Ол курдук, “Тойта Пробокска” дьон интэриэһэ 2,3 төгүл улааппыт, “Ниссан Кубка” – 73 бырыһыанынан, оттон “Ниссан Марчка” – 39 бырыһыанынан.
Кроссвердары уонна суола-ииһэ суох сиргэ аналлаах массыыналары дьон уруккуттан сэҥээрэр эрээри, быйыл “спростара” эмиэ биллэ улааппыт – 5,5%-нан.
Уһук Илин эрэгийиэҥҥэ “саамай сэҥээриллэр кроссовердар уонна внедорожниктар” диэҥҥэ маннык мааркалаах массыыналар киирбиттэр: “Тойота Ленд Крузер” (атын кроссвердардааҕар уонна внедорожниктардааҕар дьон 7,5%-нан ордук сэҥээрэр буолбут), “Митсубиси Паджеро – 6,2%, “Лада 4х4” (Нива) – 4,8%, “Хонда СР-В” – 4%, “Сузуки Джимни” – 3,7%, “Сузуки Эскудо” – 3,4%, “Тойота Хариер” – 3,3%, “Тойота Ленд Крузер Прадо” – 3,1% уо.д.а.
Оттон сыл иһигэр дьон интэриэһэ ордук маннык мааркалаах массыыналарга улааппыт: “Сузуки Гранд Витара” – инньэ 4,1 төгүл, “Жетур Х70 Плюс” – 2,9 төгүл, “Сузуки Эскудо” – 61,5 төгүл.
Массыынаны идэтийэн атыылааччылар отчуоттарыттан көрдөххө, 2026 сыл бастакы кыбартаалыгар седан уонна дьоҕус массыына орто сыаната 1,5 мөл. солк. буолбут. Аны туран, кэккэ моделлар сыаналара, былырыыҥҥыга тэҥнээтэххэ, биллэ чэпчээбит. Холобур, “Тойота Камри” сыаната 44%-нан чэпчээн 821 тыһ. солк. буолбут (ортотунан). “Тойота Карина” – 19%-нан (264 тыһ. солк.), “Тойота Витц” – 18%-нан (537 тыһ. солк.).
Эргэ (урут сүүрэ сылдьыбыт) кроссовер уонна внедорожник сыаната ортотунан 2,5 мөл. солк. буолбут. Ордук маннык моделлар сыаналара чэпчээбит: “Хонта СР-В” – 32%-нан (1,1 мөл. солк.), “Тойота Хариер” – 24%-нан (1,8 мөл. солк.), “Сузуки Эскудо” – 22%-нан (536 тыһ. солк.) уо.д.а.
