Бу күннэргэ Таилантан кэлбит Арассыыйа туриһа дьахтар мелиоидоз диэн мөкү ыарыыга сутуллан балыыһаҕа киирдэ, ыарахан туруктаах уһугулаан сытарын туһунан Роспотребнадзор сырдатар. Дьахтар омук сиригэр тиийэн араас экскурсияҕа, ол иһигэр солуону иитэр пиэрмэҕэ, сылдьыбыт.
Мелиоидоз диэн тропик дойдуларыгар көрдүгэннээн үөскүүр, бактыарыйаларынан тарҕанар ыарыы. От-мас силиһигэр, сиргэ-буорга баар буолар, салгынынан, ас-үөл, уу-хаар, сороҕор кыыл-көтөр нөҥүө тарҕанар. Киһиэхэ сыһыннаҕына, 1—21 күн устата искэ киирэн “буһар”, онтон дьэ дьайан барар.
Мелиоидоз ордук киһи ис уорганыгар охсор, сүһүрдэр, ириҥэлээх баастар тахсаллар. Импиэксийэҕэ хаптарбыт киһи температураланар, быччыҥнара уонна түөһэ ыалдьар, ириҥэлээх-чэлкэхтээх сөтөл киирэр, сыптарыйар, ирэҥэлээх баастанар. Ыарыы ордук 45-тэн аҕам саастаах, саахардаах диабеттаах, мөлтөх тыҥалаах, быардаах-бүөрдээх дьону охторор.
Бу ыарыы Вьетнам, Кытай, Индонезия, Сингапур, Австралия, Таиланд, Индия эҥээр баар. Мелиоидоһу утары анал быһыы суох эрээри, кэмигэр көрдөрдөххө, эмтэниллэр. Онон Роспотребнадзор “атах сыгынньах сылдьымаҥ, тууһа суох ууга сөтүөлээмэҥ, халаан уута ылбыт сирдэригэр күүлэйдээмэҥ, кыылы-сүөлү тыытымаҥ, бытыылкалаах ууну эрэ иһиҥ” диэн сүбэлиир.
