Дьокуускай олохтооҕо, 52 саастаах Роман Дедюкин 25 күн устата тайҕаҕа муна сылдьан баран көһүннэ. Эр киһи оҕолор саҥаларын, оонньуур хаһыыларын истэн ойууртан бэйэтэ тахсан кэлбит.
Роман Дедюкин – Дьокуускай олохтооҕо. От ыйын 1 күнүгэр Хаҥалас улууһугар “Дьөһөгөй” сылгы базатыгар үлэҕэ кэпсэтэн тиийбит уонна от ыйын 5 күнүгэр сураҕа суох сүппүт. Быыһааччылар кинини икки түһүмэҕинэн көрдөөбүттэрэ. Бастакы түһүмэххэ 10 күн устата тыаны-ойууру кэрийэн көрөн баран, туох да сибики биллибэтэҕинэн, тохтообуттара. Иккис көрдүүр түһүмэх Р.Дедюкин ойоҕун сайабылыанньатынан от ыйын 23 күнүгэр саҕаламмыта.
От ыйын 30 күнүгэр Роман Дедюкин Нөмүгүттэн 80 килэмиэтирдээх сиргэ бэйэтэ көстөн кэллэ. Эр киһи тыаттан Сергей Третьяков оҕолоро оттуур ходуһаларынааҕы күөлгэ сөтүөлүү сылдьар саҥаларын истэн тахсыбыт. С.Тертьяков муммут Дедюкин сылдьарын тута билбит.
Р.Дедюкин киһи билигин балыыһаҕа эмтэнэ, көрдөрүнэ сытар.
Роман Дедюкин аймахтара Саха сирин быыһыыр сулууспатыгар, үтүө көмөһүттэргэ, Сергей Третьяковка уонна бары көмөлөспүт дьоҥҥо махталларын тиэрдэллэр.
