Бэрт сотору кэминэн Арассыыйа сүүрбэттэн тахса эрэгийиэнигэр киһи көмүллүөхтээх сирин көрдүүргэ уонна талан атыылаһарга аналлаах сиэрбис үлэлиэҕэ. “Госуслуги” портал иһинэн оннук сиэрбиһи оҥорорго 295,5 мөлүйүөн солкуобайы көрөр былааннаахтар. Ити харчы сороҕо 14 тыһ. кэриҥэ кылабыыһа туһунан дааннайы оҥорорго туттуллуохтаах.
2026 с. ахсынньы 1 күнүттэн Арассыыйа 21 эрэгийиэнигэр “Госуслуги” портал иһинэн киһи көмүллэр сирин көрдүүр уонна атыылаһар сиэрбис үлэлиэхтээҕин туһунан сибээс министиэристибэтин чахчыларыгар сигэнэн “Коммерсантъ” суруйар. Онон сибээстээн, 14 тыһ. кэриҥэ кылабыыһа туһунан дааннайы Пространство дааннайын национальнай тиһигэр (НСПД) киллэриэхтэрэ.
Бэлиэтээн эттэххэ, бу күннээҕи туругунан, Арассыыйаҕа барыта 73 тыһыынча кылабыыһа уонна 33 крематорий үлэлиир. “Ъ” суруйарынан, 2026 с. бастакы кыбаарталыгар Арассыыйаҕа ритуальнай өҥөнү оҥорор хампаанньа ахсаана былырыыҥҥыттан 22,5%-нан эбиллибит.
Сибээс министиэристибэтэ этэринэн, “Көмүүнү салайыы” номнуо алта эрэгийиэҥҥэ үлэлии, 15 эрэгийиэҥҥэ саҥа киирээри турар үһү.
“Итинник быһаарыы уустук, ыарахан кэмҥэ дьон судаарыстыба өҥөтүн туһанарын судургутутар, былаас уорганнарын үлэтин аҕыйатар, дьону кистиир сирдэргэ (кылабыыһаларга) уонна көмүү өҥөтүн ырыынагар учуот үлэтин дьэҥкэ, албына-көлдьүнэ суох оҥорор”, – дииллэр.
“Комменсант” пилотнай бырайыак ханнык эрэгийиэннэргэ киирэрин чопчу суруйбатах. Ол да буоллар, кэлин бу бырайыак Арассыыйаҕа барыта киирэрэ сэрэйиллэр.
