Атырдьах ыйын 4 күнүттэн Анаабыр Үрүҥ Хайатын И.Спиридонов аат. тэрилтэтигэр күһүҥҥү хараал саҕаланна. Табаһыттар уонна бэтэринээрдэр дьиэ табатын чииптииллэр, эмтииллэр-томтууллар, ыарыыны сэрэтэр быһыыны биэрэллэр.
Тыаһа хаһаайыстабытын министиэристибэтэ этэринэн, тэрилтэ 8 ыстаадалаах, барыта 12 458 табалаах. Сайыҥҥы сынньалаҥ кэмигэр улахан дьоҥҥо оҕолор көмөлөһөллөр, дьиэ-уот үлэтигэр илии-атах буолаллар, төрүт үгэскэ сысталлар.
Оттон Сааскылаахха баар “Арктика” МУП хараала атырдьах ыйын 15 күнүттэн саҕаланна. Тэрилтэ 5 220 табалаах. Кэлиҥҥи икки сыл иһигэр табатын ахсаана эбиллибит. Быйыл кэлиҥҥи 15 сыл тохтуу сылдьан баран, таба этин атыылыыр былааннаахтар. Онон Сааскылаах бэйэ табатын этинэн хааччыллыахтаах.
2026 с. атырдьах ыйын 12 күнүнээҕи туругунан, Саха сиригэр 118 таба хаһаайыстыбатыгар уопсайа 182 065 дьиэ табата баар. Үөһэ ахтыллыбыт кэм иһигэр 157 618 таба маркировкаламмыт. Быйыл өрөспүүбүлүкэҕэ барыта 38 757 тугут төрөөбүт. Таба биригээдэлэригэр, ыстаадаларга уопсай 1022 киһи үлэлиир. Онтон 904 киһитэ – табаһыт, 118 киһи – чуум үлэһитэ.
2026 с. тохсунньу 1 күнүнээҕи туругунан, Саха сирэ Арассыыйаҕа Ямал-Ненец автономиялаах уокуругун кэннэ саамай элбэх табаны иитэр эрэгийиэн буолар. Биһиги кэннэ Ненец автомиялаах уокуруга кэлэр.
