Саха сиригэр элбэх киһи сөбүлээн истэр ырыаһыта, алгысчыт Виталий Очиров Мэҥэ Хаҥалас улууһун Хара бөһүөлэгэр бэйэтин үбүнэн-харчытынан, үтүө баҕатынан, сайаҕас санаатынан улахан саха балаҕанын туттаран, олохтоохторго бэлэхтээри сылдьар.
Үтүө санаа бачыымын Kyym.ru
сэҥээрдэ, ыйытыласта:
- Виталий Валерьевич, туох санаанан салайтаран маннык сыаналаах уонна дьоһун бэлэҕи оҥорорго быһаарынныҥ? Нэһилиэк көрдөспүтэ дуу эбэтэр туох атын төрүөтүнэн дуу?
- Өрдөөҕүттэн саха балаҕанын туттарар баҕа санааны иитиэхтии, толкуйдуу сылдьыбытым. Саха балаҕана ураты үтүө эйгэни саҕан таһаарар үрдүк аналлаах тутуу буоллаҕа. Онон күөгэйэр күммэр сылдьар үтүө кэммин мүччү туппакка, дьолбун, олоҕум аргыһын Вероникабын көрсүбүт Харам үтүө түөлбэтигэр, дириҥ махталбын биллэрэн, маннык саха үтүө балаҕанын туттаран бэлэхтииргэ быһаарыммытым, - диэн ырыаһыт санаатын үллэһиннэ.
Виталий Валерьевич этэринэн, тутуу бүтүннүү ырыаһыт бэйэтин үбүнэн-харчытынан барар. 9 х 12 миэтирэ иэннээх буолуоҕа. Оттон үөрүүлээх аһыллыыта, малааһына – балаҕан ыйын 15 күнүгэр былааннанар. Манна араас култуурунай уонна уопсастыбаннай тэрээһиннэр ыытыллар буолуохтара.
Kyym.ru.
Хаартыска: Kyym.ru
