ХИФУ естественнай наукалар институтун научнай үлэһитэ Надежда Чирикова фармацевтическай билим доктора учуонай степени ылла. Бу туһунан ХИФУ пресс-сулууспата иһитиннэрэр.
Надежда Чирикова: “Оскуола саҕаттан билими интэриэһиргиир этим. Сыл аайы “Инникигэ хардыы” конференцияҕа ситиһиилээхтик кыттарым. Үүнээйигэ интэриэһи оскуолаҕа үөрэппит учууталларым Парасковья Алексеевна Гоголева уонна Михаил Михайлович Черосов уһугуннарбыттара. Идэбин таларбар химияҕа уонна биологияҕа интэриэһим баһыйбыта. Тоҕо диэтэххэ, оскуолаҕа Валентина Ивановна Дьячковская уонна Оксана Николаевна Семенова олус үчүгэйдик үөрэппиттэрэ”.
ХИФУ 193 билим доктора үлэлиир. Олортон 108 – эр киһи, 85 – дьахтар. Кинилэр бары 36 үөһэ саастаахтар.
