Дьокуускайдааҕы 17-с №-дээх оскуола 11 кылааһын үөрэнээччитэ Дарина Игнатьева, Луна Марко диэн немец суруйааччыта, блогер кинигэтигэр уруһуйдаата. Уопсайа 25 уруһуй киирбит. Бу кинигэ Германияҕа хамаҕатык атыыланар.
Дарина кэпсииринэн, Луна киниэхэ “Инстаграм” социальнай ситим нөҥүө тахсыбыт. Дарина уруһуйунан дьарыктаммыта үс сыл буолбута. Ордук “Adobe Photoshop CC” диэн бырагырааммаҕа уруһуйдуур эбит. Эбэтэр кумааҕыга араас тиэхиньикэлэри туһанан уруһуйдуурун сөбүлүүр. Билигин “Autodesk Maya” диэҥҥэ 3D тиэхиньикэтин баһылыырга үөрэнэр. Ону таһынан, үөрэҕэр туйгун көрдөрүүлээх.
Луна Марко Даринаҕа биэс кинигэтин ыыппыт уонна гонорар төлөөбүт. Инникитин өссө да бииргэ үлэлиир былааннаахтар.
