ГТРК «Саха» генеральнай дириэктэрэ Харлампий Дьяконов күн сириттэн күрэннэ. Кини 71 саастааҕа. Ол туһунан, Саха сирин аҕа баһылыга Айсен Николаев алтынньы 13 күнүгэр иһитиннэрдэ.
«Уодааһыннаах ыарыы биһи кэккэбититтэн киһи киэнин кэрэмэһин, аҕа саастаах доҕорбун, Саха сирин норуотун хаһаайыстыбатын үтүөлээх үлэһитин, ГТРК «Саха» генеральнай дириэктэрин Харлампий Дьяконовы соһуччу дэгиэ тыҥырахтарынан былдьаан илдьэ барда... », - диэн тылларынан, Айсен Николаев сүтүктээхтэргэ, салайааччы чугас аймах-билэ дьонугар дириҥ кутурҕанын тиэртэ.
Кини ГТРК “Саха” тэрилтэни 2004 сылтан салайан кэлбитэ. Ол иннинэ кини, “Саха” Национальнай көрдөрөр иһитиннэрэр хампаанньатын иилээн-саҕалаан кэлбитэ.
Харлампий Дьяконов 1950 сыллаахха, ыам ыйын 28 күнүгэр төрөөбүтэ. Российскай Федерация үлэтин министиэристибэтин бочуоттаах үлэһитэ этэ, Саха сирин норуотун хаһаайыстыбатын үтүөлээх үлэһитэ этэ.
Ону таһынан, Дьяконов социальнай-олох дьаһах кыһалҕаларын эйгэтигэр, Арассыыйаҕа киэҥник биллэр учуонай этэ. 1997 сыллаахха экэниэмикэ билимин дуоктарын учуонай истиэпэнин ситиһиилээхтик көмүскээбитэ.
