Бу сайын өрөспүүбүлүкэҕэ 526 лааҕыр оҕолорго аанын арыйыа. Олортон 435-һэ күнүскү, 35-һэ үлэ уонна сынньалаҥ лааҕырдара буолуохтара. 2020-2021сылларга тэҥнээтэххэ, лааҕыр ахсаана улаатан иһэр. Билигин уопсайа өрөспүүбүлүкэҕэ баар оҕо 70%-нын хабар сорук турар.
Ону таһынан оҕолор куорат аттынааҕы хонуктаах чэбдигирдэр 41 лааҕырга уонна 15 балаакка лааҕырдарыгар сылдьыахтара. Биллэн турар, лааҕырдар бары санитария-эпидемиология ирдэбилин кытаанахтык тутуһуохтара.
Оҕо сынньалаҥын тэрийиигэ регионнааҕы судаарыстыбаннай үөрэҕи сайыннарыы бырагырааматын үбүн туһаныахтаахтар. Ол суотугар Саха сирин лааҕырдарыгар 640 оҕо босхо путевка ылар кыахтаналлар.
Быйыл 1449 оҕо өрөспүүбүлүкэ тас өттүгэр баран сынньаныахтара. Итинтэн 976 оҕо – Краснодар уонна Приморье кыраайдарыгар. 644 оҕо сынньалаҥын өрөспүүбүлүкэ уйунуо, 332 оҕо киэнин «Арктика оҕолоро» федеральнай субсидиянан төлүөхтэрэ. 473 оскуола үөрэнээччитэ өрөспүүбүлүкэ квотатын суотугар «Артек», «Океан», «Смена», «Орленок» оҕо кииннэригэр барыахтара.
Маны сэргэ дойду иһигэр оҕо сынньалаҥын ороскуотун сабар «Лааҕыртан кэшбек» бырагыраама салҕанар. Манна өрөспүүбүлүкэ таһымнаах 19, 6 оройуон, 2 куорат уокуруга лааҕырдара кыттар баҕалаахтар: Ленскэйтэн, Алдантан, Үөһээ Бүлүүттэн, Мэҥэ Хаҥаластан, Жатай бөһүөлэгиттэн - биирдии, Чурапчыттан - 2, Сунтаартан - 3, уонна Дьокуускайтан - 9 лааҕыр.
Бу бырагырааманан лааҕырдарга путевка атыыта кулун тутар 31 күнүттэн атырдьах ыйын 31 күнүгэр диэри барар. Оҕолору лааҕырдарга ыам ыйын 1 күнүттэн ыытыахха сөп. Путевка сыанатын «Мир» каартанан төлөөтөххүтүнэ биэс күн иһигэр төлөбүр 50% эргийэн кэлэр, ол эрээри 20 тыһ. элбэҕэ суох буолар. Оҕо итинник ньыманан хаста да баран кэлиэн сөп. Дьиэ кэргэн элбэх оҕолоох буоллаҕына, хас биирдиилэрин итинник төлөөн ыытыахха сөп.
Ааспыт сылга «Лааҕыртан кэшбек» бырагырааманан 420 тыһ. төрөппүт 5 млрд. солк сууммаҕа туһаммыт. Бырагыраама уонна путевкалар туһунан Ростуризм, мирпутешествий.рф, объясним.рф, оҕо сынньалаҥын уонна чэбдигириитин тэрийэр саайтарга киирэн ааҕыаххытын сөп.
Хаартыска: https://sosnovybor-ykt.ru
