Михаил Ефимович НИКОЛАЕВ, СӨ Бастакы Бэрэсидьиэнэ:
– Күндү биир дойдулаахтарым, Сахам сирин дьоно!
Саха омук кэскилин түстүүр, сайдар кыаҕын арыйар, төрөөбүт ийэ дойдубут – Саха Өрөспүүбүлүкэтэ – 100 сыллаах өрөгөйдөөх үбүлүөйүнэн итиитик- истиҥник эҕэрдэлиибин!
Арассыыйа импиэрийэтин биир саамай хаалыылаах Уһук Хотугу сирэ күн бүгүн Арассыыйа бары өттүнэн биир саамай сайдыылаах эрэгийиэнигэр кубулуйда.
Биһиги өрөспүүбүлүкэбит төрүттээччилэрин кэс тылларын – улуу нуучча омугун уонна да атын омуктары кытта эйэлээх буолууну тутан кэллибит, Арассыыйа Уһук Илинин эрэллээх эркинэ буолабыт.
Саха омук судаарыстыбата иккис үйэтигэр үктэнэн, саргылаах сатабыллаах суолларынан, киэҥ аартыктарынан салаллан иһиэ диэн бигэтик эрэнэбин!
