Бэс ыйын 14 күнүгэр, СӨ Ил Дархана Айсен Николаев өрөспүүбүлүкэтээҕи парламеҥҥа 2021 с. судаарыстыба былааһын толорор уорганнар үлэлэрин түмүгүн кэпсии туран, иитиэх оҕолоох дьиэ кэргэҥҥэ төлөбүрү икки төгүл улаатыннарыы туһунан сокуону киллэрдэ.
Айсен Николаев уопсастыбаны дьиэ кэргэн сыаннастарын тула түмүү, ийэ буолууга уонна оҕо сааска кыһамньыга ытыктабыл туһуттан, 2022 сыл өрөспүүбүлүкэҕэ Ийэ сылынан биллэриллибитин туһунан бэлиэтээн эттэ.
«Мин көҕүлээһиннэрбин, ол быыһыгар «Үйэ оҕолоро» («Дети столетия») тус сыаллаах хапытаалбын өйүүллэрин иһин, норуот дьокутааттарыгар махтанабын. Бүгүҥҥү пленарнай мунньахха мин иитиэх оҕолоох дьиэ кэргэҥҥэ төлөбүрү икки төгүл улаатыннарарым туһунан ыйааҕы киллэрдим, онон, мин эһиги өйөбүлгүтүгэр эрэнэбин», - диэн Саха сирин Ил Дархана эттэ.
Өрөспүүбүлүкэҕэ 220 тахса иитиэх оҕолоох дьиэ кэргэҥҥэ 630 тахса оҕо иитиллэр. Ордук элбэх иитиэх оҕолоох дьиэ кэргэн Үөһээ Бүлүү, Сунтаар, Ленскэй, Өлүөхүмэ, Нерюнгри, Хаҥалас, Ньурба, Горнай оройуоннарыгар уонна Дьокуускай куоракка бааллар.
