2018 сылга Беркакит-Томмот тимир суолун учаастагар “РЖД” ААУо дойду үрдүнэн тарҕатар тарыыбын туһанан саҕалыаҕа.
Таһаҕаһы тиэйиигэ-таһыыга биир кэлим олохтоммут тарыып туһаныллан бардаҕына, тимир суолун өҥөтүнэн туһанааччылар ороскуоттара кыччыаҕа. Инньэ гынан, Саха сиригэр тимир суолунан тиэллэн кэлэр бородууксуйа сыаната аччыырыгар усулуобуйа олохтонуо. Бу туһунан СӨ Бырабыыталыстыбатын бэрэссэдээтэлэ Евгений Чекин Нерюнгри куорат олохтоохторун иннингэр отчуоттууругар эттэ. Быйыл Томмот-Дьокуускай (Аллараа Бэстээх) хайысханан тимир суол тутуутун түмүктүүргэ 2 млрд солк. көрүллүбүт.
Барыллаан ааҕыынан, Томмот ыстаансыйатыгар диэри Иркутскай уобалаһыттан кэлэр ГСМ тиэйии ороскуота 19%-нан, Аллараа Новгородтан кэлэр тимир турба – 10%, Алтаай кыраайыттан тиэллэр бурдук – 26%, Татарстаан саахара – 11% кыччыаҕа.
