Арассыыйа Бырабыыталыстыбата Уһук Илиҥҥэ көтөр сөмөлүөттэргэ субсидиялаах айан сыанатын бигэргэтэр уурааҕы таһаарда. Уураахха дойду бырабыыталыстыбатын бэрэссэдээтэлэ Дмитрий Медведев илии баттаата.
Уһук Илиҥҥэ кэлэр-барар авиахампаанньаларга дойду хааһынатыттан субсидия көрүллүөҕэ. Ол суотугар кинилэр атыылыыр билиэттэрэ чэпчэтиллиэҕэ. Маннык чэпчэтиллибит билиэти кулун тутартан ахсынньыга диэри атыылыахтара. Чэпчэтиилээх билиэтинэн 23 саастарыгар диэри ыччат, 55 саастарыттан үөһэ саастаах дьахталлар, 66-тан тахсыбыт эр дьон туһаныахтара. Маны таһынан субсидиялаах билиэтинэн 1-кы курууппалаах инбэлииттэр уонна кинилэри арыаллааччы, итиэннэ оҕо эрдэхтэриттэн 2-с уонна 3-с курууппалаах инбэлииттэр туһаныахтара. Бу туһунан Уһук Илини сайыннарыы миниистирэ Александр Галушка иһитиннэрэр.
Маннык чэпчэтиилээх билиэти 73 хайысхаҕа туһаныахтара. Билиэт сыаната 10,5 тыһ. солк. үрдээбэт.
Маны таһынан Владивосток куоратыгар баар “Океан” Бүтүн Арассыыйатааҕы оҕо киинигэр сынньана барар 18 саастарыгар диэри оҕолор туһаныахтарын сөп. Бу хайысхаҕа чэпчэтиилээх билиэти сыл устата атыылыахтара. Манна Уһук Илинтэн эрэ буолбакка, Сибиир эрэгийиэннэриттэн көтөр оҕолор эмиэ туһаныахтара.
