Кулун тутар 13 күнүгэр Мииринэйгэ АЛРОСА алмаастаах хампаанньа хаһаайыстыбаннай актыыбын сылы түмүктүүр улахан мунньаҕа буолан ааста. Манна ааспыт сыл түмүктэрин, быйыл сылгы соруктарын-былааннарын туһунан кэпсэттилэр.
Билэрбит курдук, АЛРОСА аан дойдуга алмааһы хостуур биир саамай улахан тэрилтэ. Ол курдук, былырыын хампаанньа сыл түмүгүнэн барыта 39,6 мөлүйүөн караат алмааһы хостообут.
Ил Дархан Егор Борисов өрөспүүбүлүкэ АЛРОСА сүрүн акционера буоларын анаан бэлиэтээтэ. Кини этэринэн, 2009 с. экэниэмикэ кириисиһин кэмигэр АЛРОСА бородууксуйатыгар наадыйыы аччаабытын кэннэ, тэрилтэ кэккэ ыарахаттары көрсүбүтэ. Онон эрэгийиэн салалтата оччолорго РФ премьер-миниистирэ Владимир Путин аатыгар көрдөһүү түһэрбитэ. Ол түмүгэр хампаанньаҕа уларытыылары киллэрэр анал бырагыраама ылыныллыбыта.
“Мэлдьи саҥа кыахтары көрдүөххэ наада”, — диэн туран, Егор Борисов АЛРОСА кэлэктиибигэр өрөспүүбүлүкэ социальнай-экэнэмиичэскэй сайдыытыгар киллэрэр кылаатын иһин махталын биллэрдэ.
Хампаанньа бэрэсидьиэнэ Сергей Иванов 2017 сыл хампаанньаҕа бэрт уустуктук ааспытын бэлиэтээтэ. “Биһиги “Мир” рудникка тахсыбыт саахалы туораттыбыт. Саахал да тахсыбытын үрдүнэн, хампаанньа хостооһуҥҥа рекорду ситистэ – 39,6 мөл караат алмаас хостонно. Бу – Сэбиэскэй Сойуус ыһыллыбын кэннэ оҥоһуллубут устуоруйаҕа киирэр улахан рекорд. Тэрилтэ хайа маассатын обработкалааһыҥҥа, алмааһы хостооһуҥҥа, ыраас барыһы ылыыга былаанын аһары толордо”, — диэн иһитиннэрдэ тойон Иванов.
Хаһаайыстыбаннай актыып быйылгы 22-с мунньаҕар аныгылыы интерактивнай уонна мультимедийнай ньымалары туһуннылар. Даҕатан эттэххэ, бу иннинэ маннык мунньахтар сыахтара эмиэ буолан ааспыттара. Онно хамнас, уопсай уларыйыы-тэлэрийии, социальнай инфраструктура туһунан 170 ыйытыы киирбитэ.
