Уһук Илини сайыннарыы миниистирэ Александр Галушка Уһук Илинтэн дойду соҕуруу өттүгэр көтөр рейстэргэ субсидиялаах билиэттэри Арассыыйа Бырабыыталыстыбата Резервэлээх пуондаттан эбии 500 мөл. солк. көрүллүбүтүн иһитиннэрэр.
Бу туһунан дойду бырабыыталыстыбатын бэрэссэдээтэлэ Дмитрий Медведеви кытары кэпсэтии барбыт, бырабыыталыстыба Резервэлээх пуондаттан эбии 500 солк. аныырга уураах таһаарбыт. Инньэ гынан, Уһук Илинтэн көтөр 6 хампаанньа – "Аэрофлот-Российские авиалинии", "Алроса", "Норд Стар", "Сибирь", "Уральские авиалинии", "ЮТэйр" уонна "Якутия" субсидиялаах тиэйии бырагырааматыгар кыттыһыахтара. А.Галушка бу бырагыраама өссө да үбү эрэйэринэн, салгыы үлэлэһэр былааннаахтарын этэр.
Уһук Илинтэн, Симферопольтан уонна Калининградтан субсидиялаах көтүүгэ анаан бу сылга федеральнай бүддьүөттэн 3,8 млрд солк. көрүллүбүтүттэн, 2,9 млрд солк. – Уһук Илиҥҥэ анаммыта.
Чэпчэтиилээх билиэти кулун тутар 2 күнүттэн атыылаан саҕалаабыттара. Маннык билиэтинэн 23 саастарыгар диэри ыччат, 55 саастарыттан үөһэ дьахталлар, 60-нарын ааспыт эр дьон, 1-кы курууппалаах хас баҕарар саастаах инбэлииттэр уонна кинилэри арыаллааччылар, итиэннэ инбэлиит оҕону арыаллааччылар уонна 2-с эбэтэр 3-с курууппалаах инбэлиит оҕолор туһанар кыахтаахтар.
