Саха сирин үпкэ сүрүн докумуонун дохуота 4,2 млрд солк. улаатыаҕа. Бу туһунан 2018 сыллааҕы уонна былааннаммыт 2019-2020 сс. бүддьүөккэ уларытыылары киллэрэр туһунан сокуоҥҥа көннөрүүлэри бүгүн өрөспүүбүлүкэ парламеныгар дьүүллэстилэр.
Сокуон бырайыага судаарыстыбаннай бүддьүөт сүрүн ороскуотун уонна дохуотун уларытыыга туһуламмыт. Дохуоттаах чааһы уларытыы РФ Бырабыыталыстыбата дотацияны, субвенцияны, субсидияны уонна атын бүддьүөт икки ардыларынааҕы субъектары тыырыыны улаатыннарарын иһин киллэриллибит.
Сокуон бырайыагын быһыытынан, бүддьүөт дохуота 4 млрд 200 мөл. солк. улааппыт, ол эбэтэр 2,3%-нан.
Үп миниистирэ Валерий Жондоров иһитиннэрбитинэн, ити үптэн 3 млрд солк. инвест-бырагыраама бырайыактарыгар ыытыахтара, 1,6 млрд солк. 2 ыйдарыттан 3-тэригэр диэри саастаах оҕолору дьыссаатынан хааччыйыыга биэриэхтэрэ. Оттон 1,2 млрд солк. тахсаны – эбии биэнсийэҕэ. 1,6 млрд солк. тахсаны МРОТу кытары хамнас алын кээмэйин тэҥнииргэ биэриэхтэрэ.
Санатар буоллахха, кулун тутар 1 күнүнээҕи туругунан, өрөспүүбүлүкэ бүддьүөтүн дохуота 22,3 мөл. солк. туолбут (11,9%).
