Ботаническай саад - алмаастаах кыраай киинин дьиҥнээх киэн туттуута. Айылҕа барахсан биир талыы-талба муннугунан буолар.
Манна соҕуруу дойдуга үүнэр араас дьикти-дьиибэ сибэккилэр, мас-от олордуллубуттара көрүөхтэн кэрэ.
Туох-туох манна суоҕуй, доҕоттоор?
Моонньоҕон, жимолость, калина, долохоно, харас, сарбынньах...
Бу отоннору көрөн, хаартыскаҕа эрэ түһэриэххэ сөп.
Оттон отоннору амсайар, тонуур бобуулаах.
Тулаҥ – барыта видео-кэтэбил.
Манна, араҕас акация, пихта, Уһук Илин харыйата, яблоня, бэс, сарбынньах силигилээн үүнэ тураллар.
Ботаническай саады Мииринэй куорат Ойуунускай уулуссатын ыксатыгар, элбэх кэлиилээх-барыылаах сиргэ тэрийбиттэр.
Манна ордук чуумпу, сөрүүн күҥҥэ дьаарбайар олус үчүгэй.
Дьон сынньанарын туһугар диэн сатабыллаахтык, бэркэ тэрийбиттэр.
Сүрүн тэрийээччилэр – куорат дьаһалтата уонна “Кристина” сибэкки салона.
