Ахсынньы 8 күнүгэр “Үргэл” галереяҕа СӨ култууратын туйгуна, СӨ маастар-педагога, СӨ коллекционердарын Сойууһун чилиэнэ, “СӨ норуотун уус уран айымньытын сайдыытыгар үтүөлэрин иһин” анал бэлиэ наҕараадалаах норуот талааннаах маастара Татьяна Шишигина-Талба Иис “Олоҕум аргыһа – иис ” диэн үбүлүөйдээх быыстапката арылынна.
Бу күннэргэ Москваттан улахан үөрүүлээх сонун кэллэ Татьяна Николаевна Шишигинаҕа Арассыыйа норуотун маастарын үрдүк аата иҥэриллибит.
Быыстапкаҕа кини уран тарбахтара тикпит эриэккэс кэрэ тигиилээх таҥастарын, оҥоһуктарын көрүөххүт. Ону таһынан, ыал ийэлэрэ, эбэлэрбит, хос эбэлэрбит барахсаттар оҕолорун, дьиэ кэргэннэрин ханнык тэриллэри: иистэнэр массыыналары, сүүтүктэри, өтүүктэри, тимэхтэри уо.д.а. туттан тигэн таҥыннаран тыыннаах аҕалбыттарын мунньубут коллекциятын билсиэххит.
Быыстапка арыйыытыгар Татьяна Николаевна биир идэлээхтэрэ, бииргэ үлэлээбит, билэр, талаанын ытыктыыр дьоно, дьүөгэлэрэ кэллилэр, эҕэрдэлэрин тиэртилэр.
Быыстапка ахсынньы 20 күнүгэр диэри үлэлиэҕэ.
Бэйэбит корр.
