Уус Алдан улууһун Байаҕантай нэһилиэгин Тандатыттан төрүттээх Лөгөй нэһилиэгин Кэптэни бөһүөлэгин олохтооҕо, аарыма кырдьаҕаһа Иван Петрович Колодезников тохсунньу 16 күнүгэр 90 сааһын туолбут.
Кини, Аҕа дойду сэриитин саҕаланыытыгар 9 саастаах уолчаан буолан, сэрии алдьархайын, кыһалҕатын этинэн-хаанынан билбит, ыстаал курдук хатарыллыбыт хоһуун киһи. Эдэркээн сааһыттан өр сылларга колхуос биригэдьииринэн, агрономунан, сопхуос экэнэмииһинэн, рабочкомунан, управляющайынан үтүө суобастаахтык үлэлээбит.
Көрөргүт курдук, Иван Петрович чэгиэн өйүнэн-санаатынан, мындыр тылынан-өһүнэн оҕолорун, сиэннэрин, хос сиэннэрин үөрдэ-көтүтэ, дьиэҕэ-уокка туһалыы, хамсана-имсэнэ сылдьар.
Соторутааҕыта Иван Петрович сиэнин кытта ыллыы турар видеота тарҕанан, элбэх киһи сүрэҕин манньыта уулларбыта. Сиэнэ Василий Местников кэпсииринэн, эһэтэ ырыаны-тойугу уруккуттан сөбүлүүр, үлэлии-хамныы, оттуу сылдьан ыллыыр идэлээх эбит. Иван Петрович элбэх билэр ырыатыттан туохтааҕар да "Саныыбын төрөөбүт алааспын" диэн ырыаны ордорор. Бу ырыаны ыллаатаҕына, оҕо сааһа ааспыт Андылаах диэн алааһын, сайылыгын саныыр үһү.
"Эһэбит биһигини кыра эрдэхпититтэн от-мас үлэтин кыайарга, айылҕаны кытта алтыһарга, иччилэргэ, Үрдүк Айыыларга итэҕэйэргэ, сүгүрүйэргэ үөрэппитэ", - диэн Василий эһэтин туһунан истиҥник кэпсиир.
Биһиги ытыктабыллаах Иван Петровичка 4 оҕо, 14 сиэн, 25 хос сиэн тапталыгар угуттанан, этэҥҥэ бу курдук чэгиэнник сылдьарыгар, уһун үйэлээх буоларыгар баҕарабыт!
