Саха тыйаатырын Алампа саалатыгар “Тыйаатыр дьоно” бырайыак чэрчитинэн РФ үтүөлээх, СӨ норуодунай артыыстара Изабелла уонна Анатолий Николаевтар айар киэһэлэрэ буолла.
Николаевтар дьиэ кэргэн тыйаатырга үлэлээбиттэрэ хайыы үйэ үйэ аҥаарын туолла. Ол тухары саха көрөөччүтэ кинилэр айар үлэлэрин биһириир, үрдүктүк тутар, онтон бииргэ үлэлиир эдэр көлүөнэ артыыстар бастыҥ холобур оҥостоллор, сүбэ-соргу тутталлар.
Изабелла, Анатолий Николаевтар М.С. Щепкин аат. үрдүкү театральнай училищеҕа үһүс саха устуудьуйатын бүтэрэн кэлэн баран, айар суолларын саҥатыгар бастакы идэтийбит артыыстартан саха классическай тыйаатырын тыынын иҥэриммиттэрэ. Оттон билигин Николаевтар дьиэ кэргэн тыйаартыр атын аҕам саастаах кэлэктиибин кытта ол үгэскэ, ол тыыҥҥа эдэр көлүөнэ артыыстары иитэллэр-такайаллар.
Кукаакы кулуба
Киэһэни Анатолий Павлович 1906 с. саха тыллаах тыйаатыр төрүттэниитин кэпсээниттэн саҕалаабытын эрэллээх көрөөччүлэр иһийэн олорон иһиттилэр. Саха тыйаатырын төрүттээбит, араас сылларга тыйаатыры салайбыт, үлэлээбит-хамсаабыт биллиилээх драматурдар, айбыт-туппут улуу дьоммут тустарынан билии тыйаатыр олоҕун, устуоруйатын дириҥник өйдүүргэ улахан суолталааҕа саарбахтаммат.
Салгыы Изабелла, Анатолий Николаевтар бииргэ үлэлээбит сэттэ испэктээкиллэриттэн быһа тардыылары көрдөрдүлэр. Көрөөччүлэр бу туруорууларга 6-с устуудьуйа щепкиннэр кыттыбыттарын бэркэ биһирээтилэр.
Тимир Баасса
Бу киэһэ биир саамай умнуллубат түгэнинэн тапталлаах артыыстарбыт сүгүрүйэр көрөөччүлэрин ыйытыыларыгар хоруйдаабыттара буолла, ураты истиҥ иэйиини үөскэттэ. Олортон аҕыйаҕы холобурдуур буоллахха, маннык.
АРТЫЫС БУОЛАР ЭБИППИН ДИЭН САНААҔА ХАЙДАХ КЭЛБИККИНИЙ?
Анатолий Павлович:
Мин биитэр артыыс, биитэр булчут буолуохтаахпын диэн саныыр этим. Өскөтүн артыыс буолбатаҕым буоллар, булчут буолан Дьокуускайы аһата-сиэтэ сылдьыам этэ.
Эргиллиэм хайаан да
СААМАЙ ӨЙДӨӨН ХААЛБЫТ ГОСТУРУОЛУҤ?
Изабелла Васильевна:
Мин аан бастаан кыраныысса таһыгар Финляндияҕа гостуруоллаабыппын өйдөөн хаалбыппын. Тротуардарын, аспаал суолларын сомпууннуу-сомпууннуу сууйалларын көрөн наһаа дьиктиргээбитим. Ол иһин да куораттара ып-ыраас, бэл ускул-тэскил сылдьар дьонноро мап-маҥан таҥастаахтар. Аны биһиги уолаттарбыт маҥан булууһаларын саҕата нэдиэлэни быһа кэттилэр да, харааран да көрбөтө. Наһаа сөхпүтүм. Олус да ыраастык, үчүгэйдик олороллор эбит диэн санаабытым.
Эргиллиэм хайаан да
ЭҺИГИ ЫАЛ БУОЛАН, УҺУН КЭМҤЭ БИИРГЭ ЭЙЭ ДЭМНЭЭХТИК, ДЬОЛЛООХТУК ОЛОРОРГУТ КИСТЭЛЭҤЭ ТУГУЙ?
Анатолий Павлович:
Өссө да уһуу илик ээ (күлэр). Баара-суоҕа 53 эрэ сыл олордубут.
Изабелла Васильевна:
Таптал уонна бэйэ-бэйэҕэ убаастабыллаах сыһыан.
Олус истиҥ, сэргэх кэпсэтииттэн быһа тардан сырдаттахха ити курдук. “Театр дьоно” бырайыак бу киэһэтин түмүгэр Анатолий Николаев эппитинии, көрөөччү баар буолан – тыйаатыр баар, тыйаатыр баар буолан – көрөөччү баар. Онон саха омук аатын ааттатар Сахабыт тыйаатыра өссө да чэчирии, сайда туруохтун.
Мария САННИКОВА.
