Кулун тутар 3,4,5 күннэригэр үгэскэ кубулуйбут өрөспүүбүлүкэтээҕи “Якутия мастеровая” VIII быыстапка-дьаарбаҥка Дьокуускай куоракка Өксөкүлээх Өлөксөй аатынан норуоттар доҕордоһууларын киинигэр буолан ааста. Дьаарбаҥка быйыл даҕаны элбэх кыттааччыны, ыалдьыттары түмтэ.
Манна кыттыбыт дьон, маастардар бары даҕаны илиилэригэр талааннаахтарын, мындырдарын сөҕө көрөҕүн. Чахчы даҕаны, норуот айымньыта сайдарыгар материальнай култуураны тарҕатааччылар, тэнитээччилэр кинилэр эбиттэрин манна көрөн итэҕэйэҕин. Үчүгэйэ диэн, Дьахтар бырааһынньыгын иннинэ ыытыллар буолан, сонун бэлэхтэри, киэргэллэри атыылаһыахха сөп. Үксэ илиинэн оҥоһуллар буолан үйэлээхтэр. Туостан, оҕуруоттан, кылтан, туойтан, о.д.а. араас матырыйаалтан оҥоһук арааһа баар. Чэ, быһата, харах халтарыйар үлүгэрэ. Маннык кэрэ оҥоһуктары көрөн туран, илии тутуура суох тахсыбаккын. Булгуччу илииҥ иминэн имэрийэн, тутан-хабан көрөҕүн, манньыйаҕын.
Өрөбүл күн ыытыллыбыт национальнай таҥастары кэтэн баран бырааһынньыктааҕы хаамыы дьон болҕомтотун тардыан тарта. Маннык параад быйыл 2-с төгүлүн ыытылынна. Сыл аайы кыттааччыта элбээн иһэрэ харахха быраҕыллар. Быйыл 1100-тэн тахса киһи хаамыыга кыттыбыта бэлиэтэннэ.
Тыһыынчанан киһи сахалыы таҥастаах тоҕо анньан хааман иһэрэ, дьэ, кырдьык ураты көстүү. Киэн тутта, сөҕө-махтайа көрөҕүн. Дьон тиктэр да буолаллар эбит. Маннык дьэрэкээн өбүгэ таҥаһын, арай, күннээҕи таҥаска кубулутан кэтэр буоллар, дэлэлээх үчүгэй буолуо этэ дуо?
Мария Павлова – Дьокуускай куорат олохтооҕо:
-- Дьэ, мин анаан-минээн параады көрө кэлэн турабын. Былырыыҥҥытааҕар быйыл кыттааччыта лаппа элбээбит. Эчи, таҥастара үчүгэйин, киһи ымсыырыах. Дьон тигэр да буолар эбиттэр. Итиччэ үчүгэй таҥаһы сылга биирдэ бырааһынньыкка эрэ кэппэккэ, дьон тоҕо күн аайы кэппэтэ буолуой? Оо, мин итинник таҥастааҕым буоллар, кыбыстыбакка, киэн тутта кэтиэ этим ээ. Оччоҕо эрэ омук быһыытынан уратыбытын көрдөрүө этибит буоллаҕа. Бу тэрээһин быйыл эрэкилээмэтэ мөлтөх дуу хайдах дуу. Мин дьүөгэлэрбиттэн истэн кэллим.
Марина Неустроева – Мэҥэ Хаҥаластан кэлэ сылдьар ыалдьыт:
-- Быйыл иккис сылбын быыстапканы көрө кэллим. Былырыын эмиэ сылдьыбытым. Киһитэ элбэҕэ, анньыһа сылдьан тугу да сатаан көрбөккүн. Маннык өрөспүүбүлүкэ таһымнаах, дьон сэҥээрэн сылдьар быыстапкатын арыый киэҥ-куоҥ зданиеҕа оҥоруохтарын сөп эбит дии санаатым. Маны тэрийээччилэр болҕомтоҕо ылыахтарын наада эбит. Ордук бастакы этээскэ киһи лыык курдук элбэҕиттэн тугу да сатаан көрбөтүм.
Быйыл керамистар, туойунан оҥорооччулар үчүгэй баҕайы иһиттэри оҥорон аҕалбыттарын кэрэхсии көрдүм. Быыстапкаҕа киһи сэргии көрөрө элбэх. Маннык быыстапкаларга сылдьан киһи элбэҕи билэр, сайдар ээ.
Саргылаана БАГЫНАНОВА.
