Ханты-Мансийскай куоракка 16-с төгүлүн ыытыллыбыт “Дух огня” диэн норуоттар икки ардыларынааҕы киинэ бэстибээлигэр Константин Тимофеев “Хара Бэкир” киинэтэ “Муусуканы кытары бастыҥ үлэ” диэн анал бириэмийэни ылла. Маны таһынан, Владимир Мункуев (“Уол оҕото”) дьүүллүүр сүбэ анал бирииһин ылла.
Саха киинэтэ араас таһымнаах бэстибээллэргэ кыттан кыайара улахан кэпсэл да буолбат буолла. Ити – биһиги киинэбит үрдүк таһымнааҕын туоһулуур. 16-с төгүлүн ыытыллар норуоттар икки ардыларынааҕы “Дух огня” кинемотаграфистар дебюттарын бэстибээлэ 2003 сылтан ыытыллар. Бэстибээл бэрэсидьиэнэ – Сергей Соловьев. Дьүүллүүр сүбэҕэ Португалия, Франция, Германия, Арассыыйа аатырбыт режиссердара, кинемотагрофистара киирэллэр.
Констанин Тимофеев, режиссер:
- Бэстибээлгэ Саха сириттэн икки хартыына талыллыбыта. Мин режиссер быһыытынан маннык таһымнаах бэстибээлгэ аан бастакытын кытынным. Дьүүллүүр сүбэҕэ олус таһымнаах, киинэ эйгэтигэр аан дойдуга биллэр-көстөр дьон баар. Көрөөччү саала иһигэр куруук толору буолар. Мин “Хара Бэкир” киинэбин “За лучшую работу с музыкой” диэн анал бирииһинэн бэлиэтээтилэр. Бэстибээлгэ тас дойдулартан кытары уонча толору метражтаах уонна уонтан тахса кылгас метражтаах киинэ кытынна. Киинэбэр муусуканы “URAAN” бөлөх уонна Семен Ченянов оҥорбуттара. Звукорежиссер – Сергей Ярмонов. Бэстибээл олус таһымнаахтык ыытыллар эбит. Ханты-Мансийскай Саха сиригэр хайдах эрэ майгынныыр курдук.