2018 сыл Хаҥалас улууһугар ыччаттарга улахан тэрээһин буолаары турар. Быйыл сайын араас улуустартан Ыһыах ыһа ыччат түмсэрэ былааннанар. Ол тэрээһиҥҥэ бэлэмнэнэн, кулун тутар 16 күнүгэр Булгунньахтаах “Дьиэрэй ырыа” култуура киинигэр “Ыллаа – туой, Хаҥалас ыччата” ыччаттарга аналлаах ырыа куонкуруһа 4-с төгүлүн үрдүк таһымнаахтык ааста.
Куонкурус сыала-соруга – ыччаты ырыаҕа угуйуу, айар талааннаах ыччаты киэҥ эйгэҕэ таһаарыы, көхтөөх олоххо көҕүлээһин, Хаҥалас ыччата саха эстрадатыгар тахсарыгар таһымнарын үрдэтии, улуус биллэр-көстөр, тумус туттар дьоннорун билиһиннэрии, үтүө сырдык ааттарын үйэтитии. Бу куонкурус Хаҥалас улууһа култуураҕа уонна духуобунай сайдыыга салалтатын сүрүн испэсэлииһэ, СӨ култууратын туйгуна Наталья Федорова бырайыагынан бэрт тэрээһиннээхтик ыытыллар.
Ол курдук бу сылга куонкурус биһиги биир дойдулаахпыт, Тиит Арыы Чыкаалабыттан төрүттээх, Аҕа дойду сэриитин кыттыылааҕа, СӨ норуотун хаһаайыстыбатын үтүөлээх үлэһитэ, авиация полковнига Иван Федоров 100 сааһыгар, кини сырдык кэриэһигэр ананна. Күрэххэ Тиит Арыы, Улахан Аан, Булгунньахтаах, Бэстээх, Нөмүгү, Өктөм, II Дьөппөн нэһилиэктэрин ыччата көхтөөх кытынна.
Күөн күрэс икки түһүмэҕинэн ыытылынна. Дьүүллүүр сүбэҕэ бэрэссэдээтэлинэн Покровскай куорат оҕо ускуустуба оскуолатын муусукаҕа педагога, улууспут хуорун хормейстер-дирижера Л.С.Артамонова, Дьокуускай куораттан Аркадий Алексеев аатынан “Ыллаа эдэр саас” өрөспүүбүлүкэтээҕи ырыа күрэҕин лауреата, оҕо дыбарыаһын эбии үөрэхтээһин педагога Милена Борисова-Окоемова, Булгунньахтаах оҕо мууусука оскуолатын педагога К.И.Жиркова-Сергеева, Хаҥалас улууһун “Арчы” норуот айымньытын дириэктэрэ Л.В.Харитонова үлэлээтилэр.
Күөн күрэс түмүгүнэн Гран-при кыайыылааҕынан Улахан Аантан Роман Данилов ааттанна.
Бу күн Хаҥалас эдэр ыччатыгар анаммыт Гимн сүрэхтэннэ. Бырайыак ааптара – Хаҥалас улууһун ыччат бэлиитикэтин сүрүннүүр испэсэлииһэ Айсен Федоров, ырыа тылын суруйда Христофор Горохов-Элгэстэй, мелодиятын Милена Борисова суруйдулар. Ырыаны ыччаттар өрө көтөҕүллэн толорон кэнсиэр таһымын үрдэттилэр, көрөөччүлэр киэҥ биһирэбиллэрин ыллылар.
Гала-кэнсиэр фейерверынан түмүктэннэ. Кыайыылаахтарга өйдөбүнньүк кубоктар, грамоталар, сэртипикээттэр туттарылыннылар. Аныгыскы ырыа бырааһынньыга аны икки сылынан, көһө сылдьар вымпел быһыытынан кыайыы өрөгөйүн билбит Роман Данилов дойдутугар – Улахан Ааҥҥа ыытыллыаҕа.
Лидия Харитонова, Хаҥалас улууһа.
