Күндү редакция! Эhиэхэ 75 сааhыгар сылдьар эбэ Анна Дмитриевна Конникова суруйабын. Мин алта сиэннээхпин, бары миэхэ олус күндүлэр. Хас биирдии сиэним кыраларыгар анал ырыалаах этилэр. Оҕолорбут сахалыы эйгэҕэ улаатаннар, сиэннэрбит эмиэ саха буолан төрөөбүттэринэн киэн тутталлар, төрөппүттэрин «ийээ, аҕаа» - диэн сахалыы ыҥыраллар. «Кыым» хаhыаты бары дьиэнэн сэргээн, таптаан ааҕабыт.
«Биэбэйик» интерактивнай сахалыы биhик ырыатын күрэһэ саха оҕотун сахалыы тыыҥҥа үөрэтэр соруктаах. Биhик ырыата киһи аймах үөскүөҕүттэн ылланар буолуохтаах. Биhиги бастыҥ суруйааччыларбыт Анемподист Софронов, Алексей Кулаковскай, Платон Ойуунускай, Семен Данилов бэйэлэрин айан хаалларбыт айымньыларыгар чугас дьонноругар тапталлара көстөр. Ол курдук Анемподист Софронов «Миигин тоҕо ыллаппаккын?» диэн хоhоонугар маннык суруйар:
…«Эн хорус санааҕын куттуом суоҕа,
Аргыый-аргыый аччыгыйдык айаҕым иhигэр
Ыллыым ээ, ыллыым ээ, ыллыым.
Уйгулаах ньуургун,
Намчы солко ньалҕаархай баттаххын,
Субуруйуу солко
Субуллар суhуоххун
Сааhым тухары
Санаарҕатыам суоҕа!
Ыллыым ээ, ыллыым!
Итинник ис хоһоонноох Семен Данилов «Эйиигин утута-утута» хоhооно оҕотугар ананар.
Бу олорон санаатахха, олоххо элбэх үөрүүнү аҕалар дьон – оҕолор уонна сиэннэр. Оҕо төрөөhүнэ – дьиэ кэргэҥҥэ улахан дьол. Мин 6 сиэним хас биирдиилэрэ анал ырыалаахтар, хоhоонноохтор.
Биhиги улахан кэтэhиилээх сиэммитигэр анаан:
Сырдык ыра санаабыт
Туолан, олус үөрдүбүт!
«Эhэ, эбэ» дэттэрэр
Хайдах курдук күндүнүй!
Сотору буолан баран аны уол сиэннэммиппит, олус тэтиэнэх, элбэх саҥалаах этэ. Онуоха:
Биhиэхэ ким баарый?
Сардаҥалыын турааччы,
Чыычаах курдук ыллааччы
Чуораан курдук чугдаарааччы? - диэн хоhуйарбыт.
Онтон, 2 сыл буолан баран, оҕолорбут кыыс сиэни бэлэхтээбиттэрэ:
Алмаастаах Анечка
Атаахтыыра биллибэт.
Эбэ, эhэ оҕотун
«Дьиэҕэ хотун» дэhэллэр.
Онтон Кира төрөөбүтэ, сүрдээх сэмэй этэ:
- Биhиги дьиэҕэ баар дьонтон
Киммит ордук күндүнүй?
-Биллэн турар, Кирабыт,
Мурун бүөтэ киhибит.
Ол кэнниттэн Эльза күн сирин көрбүтэ:
Олус да олус таптыыр
Чыычаахпыт Эльзочка -
«Кыра» диэҥҥит сэнээмэҥ.
Киэргэнэрин сөбүлүүр.
Үөрдэҕинэ-көттөҕүнэ,
Тула өттө сырдыыр-үөрэр.
Ити курдук. Сороҕун ырыа курдук ыллыырым, сороҕо анабыл хоhооннор.
Билигин олох түргэн тэтиминэн сайдар, оҕо төрөөбүт тылын сүтэрбэтин иннигэр элбэх үлэ барыахтаах. Онтон биирэ – биhик ырыата. Ийэ тапталынан үөскээбит, эмиий үүтүнэн бэриллибит биһик ырыата үйэлэргэ сүтүө суохтаах. “Биэбэйик” күрэс көмөтүнэн айбыт ырыам, идэлээх дьоҥҥо оҥоһуллан, киэҥ эйгэҕэ тахсыа диэн эрэнэбин.
Анна Дмитриевна Конникова, Уус Майда улууһун Күп нэһилиэгин олохтооҕо.
Сэҥээриилэр