Саха сиригэр киинэ тиһигин сайдыытыгар анаан быйыл федеральнай бүддьүөттэн 25 мөл. солк. көрүллүөҕэ. Бу туһунан “Якутская республиканская киносеть” кинематографистар ассоциацияларын дириэктэрэ Петр Чиряев иһитиннэрэр.
“Киинэ пуондата быйыл Саха сириттэн өссө 5 сайаапканы өйөөтө. Былырыын киинэ пуондатын нөҥүө 4 сайаапканы өйөөбүттэрэ. Инньэ гынан, бэс ыйа бүтүөр диэри Чурапчыга, Жатайга, Хаандыгаҕа уонна Өксөкүлээх аатынан Норуоттар Доҕордоһууларын Дьиэтигэр киинэ саалларын арыйыахпыт. Быйыл 5-тии мөл. солк. Өлүөхүмэҕэ, Мохсоҕоллооххо, Ытык Күөлгэ, Хатаска уонна Уус Ньараҕа киинэ саалатын арыйарга анаан тэриллэри атыылаһалларыгар үллэриэхпит” , — диир Петр Чиряев.
Быйыл Арассыыйа үрдүнэн Киинэ пуондата кулууптарга, култуура дьиэлэригэр 172 киинэ саалатын арыйыыга анал бырагырааманан үбүлээһини көрүөҕэ. Инньэ гынан, быйыл «Якутская республиканская киносеть» өрөспүүбүлүкэҕэ 19 киинэ саалалаах буолуохтаах.
